Indyjec Pranaŭ Łał prystasavaŭ prahramu dla ślapych da mastactva: vOICe dapamahała raspaznavać ślapym formu abjektaŭ i dystancyju da ich, Łał ź jaje dapamohaj robić fota-«pieśni», raspaviadaje New Scientist.
Ślapy ad naradžeńnia Łał pakul maje ciažkaści z raspaznavańniem taho, što «śpiavaje» jamu fota z mnostvam składanych abjektaŭ. Ale čaściej za ŭsio moža zrazumieć, što na piarednim płanie i što na fonie. Najlepšyja fota-«pieśni» sa svaich vandrovak jon źbiraje ŭ kalekcyju.
«Piejzažy z mnostvam roznych elemientaŭ hučać cikava, — kaža jon. — Naprykład, most sa šmatlikimi kabielami ci piejzaž z ručajami i kamianiami. Heta jak karcina-arkiestr».
Prahrama vOICe robić kalarovuju vyjavu čorna-biełaj, zatym hukam apisvaje vynik źleva naprava. Čym vyšej śvietły abjekt na fota, tym vyšej ton huku, a čym bolš jaskravy abjekt, tym bolšaja hučnaść. Dla karystańnia prahramaj Lił nosić na hałavie kamieru, złučanuju sa smartfonam.
Prahrama dazvalaje ślapym razroźnivać niarezkija abjekty amal tak ža, jak ludziam z narmalnym zrokam, navat čytać ź jaje dapamohaj drukavanyja słovy i adroźnivać kolery. Jak akazałasia, prahrama zdolnaja pakazać treniravanamu čałavieku cełyja karciny.
***
Inšym čynam robić fota nieviduščaja biełaruska Natalla Kavalevič: prahrama na telefonie słovami apisvaje joj toje, što traplaje ŭ abjektyŭ kamiery. Uviesnu ŭ kulturnaj prastory «CECH» prachodziła jaje fotavystava «Tvar, jaki zajmaje kvietku».
