Damokłaŭ mieč kryminalnaha pakarańnia znoŭ navisaje nad šeraham apazycyjnych aktyvistaŭ, najpierš moładzievych.
U pryvatnaści, Michaiłu Paškieviču, Michaiłu Kryvavu, Uładzimieru Siarhiejevu vystaŭlenyja abvinavačańni ŭ spravie ab padziejach 10 studzienia. Pieradajecca ŭ sud sprava Andreja Kima, źviazanaja z tymi samymi padziejami — vybucham vuličnaj aktyŭnaści pradprymalnikaŭ, što vidavočna napružyŭ kiroŭnuju viarchoŭku i traktujecca jak masavyja biesparadki. Taksama zatrymany viciabčuk Siarhiej Parsiukievič, aktyvist pradprymalnickaha ruchu, jakoha mohuć abvinavacić u źbivańni milicyjanta (sa słoŭ Parsiukieviča, usio było z dakładnaściu da naadvarot).
Chtości čuchaje patylicu: dyk što, kapiec "adlizie"? Ale ž adlihi i nie było. Usie hetyja manipulacyi ź minimalnym źmiakčeńniem losu niekalkich palitviaźniaŭ (Aŭtuchovič, Lavonaŭ, Daškievič, Fińkievič, trochi bolej u sensie skasavańnia terminu pašenciła chiba Klimavu) trapna kvalifikavanyja jak handal žyvym tavaram. Ciapier my bačym, što tavarnaha deficytu nie pradbačycca.
I nie abaviazkova davać niekalki hadoŭ. Štrafy, sutki — heta nia tak brutalna ŭ vačoch Zachadu, ale takoj voś taktyki drobnaha fołu dastatkova, kab narod nadta nie vytyrkaŭsia.
Zaraz va ŭładaŭ jašče j para prahmatyčnych lakalnych metaŭ. Pa-pieršaje, dać urok "vašyvym błocham" dy apazycyjaneram, što davoli technalahična asiadłali ichni spantanny pratest minułaj zimoj. Pa-druhoje, źbić maštab Dnia Voli.
Zachadu było b lahična pierachodzić da pakietnaha patrabavańnia: vyzvaleńnie ŭsich palitviaźniaŭ plus poŭnaje spynieńnie palityčna matyvavanaha pieraśledu. Darečy, u 12 umovach Eŭraźviazu (jakija mała chto pamiataje:) druhoj farmuloŭki niama (dzieści asobna fihuruje tolki nia nadta vyraznaje patrabavańnie "spynić advolnyja aryšty i zatrymańni, drennaje abychodžańnie ź ludźmi").
Eŭropa traplaje ŭ zahannaje koła, kali tamtejšyja dziejačy raz-poraz viaducca na tannuju prynadu taktyčnych sastupak biełaruskich uładaŭ. Represiŭnaja mašyna peryjadyčna pačynaje novuju kasavicu.
P.S. Pieradali ŭ sud spravu Kaciaryny Sałaŭjovaj ("MF").
