7 kastryčnika ŭ minskim parku Družby narodaŭ adbyŭsia mitynh, prymierkavany da Suśvietnaha dnia baraćby za hodnuju pracu. Akcyju zładziŭ Biełaruski kanhres demakratyčnych prafsajuzaŭ.
U mierapryjemstvie ŭziali ŭdzieł staličnyja i rehijanalnyja aktyvisty prafsajuzaŭ — členaŭ BKDP, siarod jakich Biełaruski niezaležny prafsajuz, Svabodny prafsajuz Biełaruski, Svabodny prafsajuz mietalistaŭ i Prafsajuz pracaŭnikoŭ radyjoelektronnaj pramysłovaści. Jak pieradaje BiełaPAN, na mitynh taksama pryjšli lidar Abjadnanaj hramadzianskaj partyi Anatol Labiedźka i staršynia Biełaruskaj partyi levych «Spraviadlivy śviet» Siarhiej Kalakin. Ale jany nie vystupali na mitynhu, a trymalisia zboku.
Prafsajuznyja aktyvisty raściahnuli transparanty i płakaty z nadpisami «Razam za hodnuju pracu! Razam za hodnaje žyćcio!» «Usim pracoŭnym — hodny zarobak», «Kantrakt — piatla dla rabočych» i h.d.
U hetym hodzie Suśvietny dzień baraćby za hodnuju pracu adznačajecca pad łozunham «Skončym sa skvapnaściu karparacyj». U svajoj pramovie staršynia BKDP Alaksandr Jarašuk adznačyŭ, što ŭ Biełarusi karparacyjaŭ niama, ale jość dziaržava: «Dziaržaŭny kapitalizm, u jakim my žyviem, jašče bolš ahidny, čym toj kapitalizm, jaki my nazirajem u śviecie, bo jon nie pakidaje ni adnaho šancu dla pracoŭnaha čałavieka. Kali kazać ab pryncypach i normach hodnaj pracy, to my kanstatujem, što jany siońnia biełaruskimi ŭładami nie zabiaśpiečvajucca».
Pa słovach Jarašuka, kiraŭnictva biełaruskaj dziaržavy dahetul nie stvaryła hodnyja ŭmovy pracy na šmatlikich pradpryjemstvach. Jon źviarnuŭ uvahu, što nie adbyvajecca madernizacyja pradpryjemstvaŭ, mnostva ludziej hinie i kalečycca na vytvorčaści. Jarašuk zaznačyŭ, što ŭ Biełarusi prahresuje biespracoŭje i «dehraduje pracoŭnaje zakanadaŭstva», abciažaranaje šeraham dekretaŭ, jakija značna ŭskładnili ŭmovy pracy.
