 |
Na žal, u prezentacyi knihi nie brała ŭdziełu aŭtarka: jana vielmi chacieła b być razam z udzielnikami, ale ambasadar Biełarusi ŭ ZŠA Michaił Chvastoŭ prapanavaŭ napisać list Alaksandru Łukašenku, kab jaje ŭpuścili ŭ krainu. Spadarynia Surviła skazała, što absalutna nie hatovaja napisać taki list, a pa‑druhoje, jana ličyć nienarmalnym jechać u Biełaruś, kali jana zmahajecca suprać ciapierašniaha režymu.
Kniha «Daroha. Stoŭpcy. Kapenhahen. Paryž. Madryd. Atava. Miensk» vyjšła ŭ seryi «Biblijateka Svabody. XXI stahodździe». Vioŭ viečarynu zasnavalnik i kaardynatar seryi Alaksandar Łukašuk. Na prezentycyi svaimi ŭražańniami pra knihu dzialilisia dziejačy kultury ‑‑ siarod inšych piśmieńnik Uładzimier Arłoŭ, historyk Zachar Šybieka. Naviedniki słuchali ŭryŭki z knihi, jakija Ivonka Surviłła čytała na chvalach Radyjo Svaboda.
Adna z udzielnic prezentacyi, staršynia Rady Zhurtavańnia biełarusaŭ śvietu «Baćkaŭščyna» Alena Makoŭskaja, skazała ŭ interviju Svabodzie:
«Hetaja kniha maje vialikaje značeńnie, bo heta ŭspaminy dziejnaha staršyni Rady BNR. Ale najbolš mianie uraziła toje, što Ivonka Surviłła ŭ knizie adkryvajecca nia tolki jak hramadzki dziejač, jak palityk, ale i jak čałaviek, jak žančyna sa svaimi pačućciami, sa svaimi pieražyvańniami, jak dačka i maci, jak žonka, jakaja kachaje svajho muža i razam ź im pracuje. Heta ŭspaminy vielmi hłybokaha čałavieka, čałavieka ź vielmi dalikatnym unutranym śvietam. Hetyja ŭspaminy taksama adkryvajuć niekatoryja staronki žyćcia biełaruskaj emihracyi, jakija da hetaha času byli zakrytyja ‑‑ naprykład žyćcio biełaruskaj emihracyi ŭ Danii ci Hišpanii na tyja časy».
Staršynia partyi BNF Lavon Barščeŭski skazaŭ siońnia na prezentacyi, što sustrakaŭsia ź Ivonkaj Surviłłaj u Strasbury, dzie prachodziŭ tydzień Biełarusi, pryśviečany śviatkavańniu 90‑ch uhodkaŭ BNR, i, vidać, adziny z prysutnych u zali maje knihu «Daroha» ź jaje aŭtohrafam.
