Kampietentnym orhanam Biełarusi pieradadzieny biełaruski hramadzianin Hieorhij Žuk. Jak paviedamlaje prakuratura Maskoŭskaj vobłaści, jon adšukvaŭsia za ŭčynieńnie złačynstva, praduhledžanaha č. 3 art. 430 KK (atrymańnie chabaru).
Pavodle infarmacyi pravaachoŭnych orhanaŭ, Žuk, zajmajučy pasadu vykanaŭca abaviazkaŭ načalnika ŭpraŭleńnia papiaredniaha rasśledavańnia HUUS Minskaha harvykankama, u 2005 hodzie atrymaŭ ad zasnavalnika pryvatnaha handlovaha pradpryjemstva chabar u 80 tysiač dalaraŭ ZŠA. Za ŭkazanuju sumu Žuk abiacaŭ spynić pravierki arhanizacyi, a taksama kryminalnuju spravu, raspačatuju ŭ dačynieńni da partniora zasnavalnika.
Paśla ŭčynieńnia złačynstva Žuk schavaŭsia ad pravaachoŭnych orhanaŭ.
U sakaviku 2015 hoda supracoŭniki palicyi zatrymali jaho na terytoryi Arechava-Zujeŭskaha rajona Maskoŭskaj vobłaści.
U dačynieńni da Žuka orhany prakuratury Maskoŭskaj vobłaści praviali ekstradycyjnuju pravierku. Materyjały byli nakiravany ŭ Hienieralnuju prakuraturu RF, pa rašeńni jakoj ciapier jon vydadzieny biełaruskamu boku dla pryciahnieńnia da kryminalnaj adkaznaści.