U siaredzinie śniežnia ŭ asobnych kaściołach Biełarusi adčyniacca «śviatyja bramy daravańnia» («dźviery miłasernaści») dla viernikaŭ.
Papa Francišak adčyniaje Śviatuju bramu baziliki Śviatoha Piatra ŭ Vatykanie. Fota AFP
Jak paviedamiŭ 8 śniežnia na pres-kanfierencyi ŭ Minsku mitrapalit Minska-Mahiloŭski arcybiskup Tadevuš Kandrusievič, upieršyniu ŭ historyi katalickaj carkvy papa Francišak daŭ mahčymaść adčyniać «śviatyja bramy daravańnia» ŭ asobnych kaściołach i sanktuaryjach pa ŭsim śviecie.
U roznyja pieryjady historyi carkvy «śviatyja bramy», prachodžańnie praź jakija daruje adpuščeńni hrachoŭ, adčynialisia tolki ŭ bazilicy Śviatoha Piatra ŭ Vatykanie, bazilicy Maci Božaj vialikaj, bazilicy Śviatoha Jana Łateranskaha i bazilicy Śviatoha Paŭła za Aŭrelijanavymi ścienami. «Ale nikoli jašče «dźviery miłasernaści» nie adčynialisia ŭ asobnych jeparchijach, kaściołach, sanktuaryjach. Siońnia papa daje takuju mahčymaść, tamu nas čakaje ŭnikalnaja padzieja», — padkreśliŭ Kandrusievič.
Hod Božaj miłasernaści ŭ katalickim śviecie pačynajecca 8 śniežnia. U hety dzień roŭna 50 hadoŭ tamu zaviaršyŭsia Druhi Vatykanski sabor, jaki «staŭ aktam miłasernaści ŭ dačynieńni da kaścioła i čałaviectva». Pačatak Hoda miłasernaści adznačyć adkryćcio papam Franciškam śviatych dźviarej u bazilicy Śviatoha Piatra ŭ Vatykanie. «Apošni raz hetyja dźviery adčynialisia ŭ 2000 hodzie, paśla — zapiačatvalisia. Praź dźviery my ŭvachodzim, kab sustreć kahości doma, u dvary abo inšym miescy. Tak i papa siońnia adčynić hetyja dźviery, kab kožny moh prajści praź ich i sustrecca z božaj miłasernaściu», — raskazaŭ arcybiskup Kandrusievič.
U asobnych jeparchijach «śviataja brama» adčynicca ŭ niadzielu, 13 śniežnia. Naprykład, u minskim kaściole Śviatych Symona i Aleny (Čyrvony kaścioł) u hety dzień u 12.30 pačniecca nabaženstva, padčas jakoha minčuki pačujuć uryvak papskaj buły z abjaŭleńniem Hoda miłasernaści. Paśla nabaženstva vierniki projduć pracesijaj pa vulicach Vaładarskaha i Kamsamolskaj da archikafiedralnaha kaścioła Najśviaciejšaj Panny Maryi na płoščy Svabody, dzie i adbudziecca adkryćcio «dźviarej miłasernaści».
U Minska-Mahiloŭskaj archijeparchii «brama daravańnia» adčynicca ŭ asobnych kaściołach i sanktuaryjach Minska, Mahilova i Budsłava, u Hrodzienskaj jeparchii — u Hrodnie i Lidzie, u Viciebskaj — u Viciebsku i Brasłavie, a ŭ Pinskaj — u Pinsku, Homieli, Baranavičach i Breście.
