Bolš za 500 indyvidualnych pradprymalnikaŭ (IP) Viciebskaj vobłaści sabralisia ranicaj 28 studzienia kala abłvykankama. IP ź Viciebska, Oršy, Połacka i inšych haradoŭ zapatrabavali ad čynoŭnikaŭ abmierkavać prablemy małoha biźniesu.
Zaraz u budynku viciebskaha filijała Mižnarodnaha instytuta pracoŭnych i sacyjalnych adnosinaŭ, jaki raźmieščany pobač z abłvykankamam, prachodzić sustreča IP z pradstaŭnikami abłvykankama, paviedamiŭ BiełaPAN staršynia hramadskaha abjadnańnia pradprymalnikaŭ «Pierśpiektyva» Anatol Šumčanka.
«Ludziej vielmi šmat. Jany sprabujuć danieści da ŭłady svaju pazicyju. Hałoŭnaje pytańnie — kab im dali mahčymaść pracavać, — raskazaŭ Šumčanka. — Pradprymalniki ź Viciebska paviedamlajuć, što ŭłady razvodziać rukami, havorać, što adkažuć piśmova, sami zrabić ničoha pa vialikim rachunku nie mohuć».
Stychijny schod IP zaraz prachodzić taksama ŭ Homieli na rynku «Prudkoŭski». Na praciahu studzienia padobnyja schody prajšli ŭ mnohich haradach Biełarusi. U niekatorych vypadkach pradprymalnikam udałosia damahčysia sustrečy z uładami, jany pieradali svaje patrabavańni, ale na rašeńnie prablem IP heta pakul nijak nie paŭpłyvała.
Nahadajem, z 1 studzienia ŭ Biełarusi dziejničaje ŭkaz № 222 «Ab rehulavańni pradprymalnickaj dziejnaści i realizacyi tavaraŭ indyvidualnymi pradprymalnikami i inšymi fizičnymi asobami». Jon zahadvaje IP realizoŭvać pradukcyju lehprama, uviezienuju z krain Mytnaha sajuza, tolki z supravadžalnymi dakumientami. Prablema składajecca ŭ tym, što rasijskija pastaŭščyki, u jakich zakuplajuć tavar bolšaść biełaruskich IP, jak praviła, admaŭlajucca vydavać dakumienty ab pachodžańni pradukcyi albo dajuć fiktyŭnyja daviedki. U vyniku IP štrafujucca, u ich kanfiskujuć tavar. Pakolki nieadnarazovyja prośby pradprymalnikaŭ da ŭładaŭ admianić ukaz pačutyja nie byli, z pačatku novaha hoda ŭ Minsku i inšych haradach Biełarusi mnohija rynki i handlovyja centry apynulisia praktyčna pustymi — pieravažnaja bolšaść IP prypynili pracu z-za niemahčymaści vykonvać patrabavańni ŭkaza.
