Biełaruskaja sacyjał-demakratyčnaja partyja (Hramada) płanuje vyłučyć na parłamienckich vybarach, jakija adbuducca nie paźniej za 11 vieraśnia, jak maha bolš partyjnych kandydataŭ u deputaty.
Pra heta zajaviła staršynia partyi Iryna Vieštard, vystupajučy ŭ Minsku na XVI čarhovym źjeździe arhanizacyi, jaki prachodzić 13 sakavika ŭ Minsku.
«Na siońnia ŭ śpisie patencyjnych kandydataŭ u deputaty — 26 čałaviek. Jak minimum pažadana hetuju kolkaść pretendentaŭ pavialičyć u dva razy», — skazała jana.
Pry hetym Vieštard ličyć važnym, kab kandydaty ŭ deputaty, vyłučanyja BSDP (Hramada), nie pradstaŭlali inšyja arhanizacyi. «Nie treba davać mahčymaści parazitavać na našych strukturach», — padkreśliła jana.
Vieštard zaznačyła, što partyja pavinna brać udzieł u vybarach jak u palityčnaj kampanii, jakaja dazvalaje prapahandavać siarod nasielnictva idei sacyjał-demakrataŭ, pracavać na stanoŭčy imidž partyi. U toj ža čas jana ličyć, što demakratyčnym kandydatam na majučych adbycca vybarach nieabchodna budzie abmierkavać metazhodnaść źniaćcia svaich kandydatur pierad hałasavańniem.
Taksama Vieštard zajaviła, što ŭžo adrazu paśla źjezdu BSDP (Hramada) pavinna pačać padrychtoŭku da prezidenckich vybaraŭ 2020 hoda. Jana ličyć, što partyja pavinna vystavić na ich svajho kandydata ŭ prezidenty. Pry hetym, padkreśliła jana, heta nie admaŭlaje mahčymaści pieramoŭ ź inšymi demakratyčnymi strukturami nakont vyłučeńnia adzinaha kandydata.
XVI spravazdačna-vybarny źjezd Biełaruskaj sacyjał-demakratyčnaj partyi (Hramada) prachodzić 13 sakavika ŭ Minsku. U im biaruć udzieł bolš jak 80 delehataŭ z roznych rehijonaŭ Biełarusi.
Na źjeździe buduć abranyja staršynia partyi, jaho namieśniki, členy centralnaha kamiteta, płanujecca abmierkavać źmieny i dapaŭnieńni ŭ statut i vybarčy rehłamient.
