Z vostraj krytykaj roliku ŭ sacsietkach vystupiła Julija Cimafiejeva. Paetka i pierakładčyca, viadomaja svaimi feministyčnymi pohladami, aburyłasia, što konkurs reklamujuć z dapamohaj madeli, i papraknuła aŭtaraŭ videa ŭ adsutnaści fantazii. Na jaje dumku, klip hety moh reklamavać stryptyz-klub ci žanočuju bializnu, ale anijak nie piesienna-paetyčny konkurs.
Da jaje mierkavańnia dałučylisia niekatoryja inšyja asoby, u tym liku filozaf Volha Šparaha, jakaja vykazała dumku, što ŭ kultury, jakaja i tak pierapoŭnienaja źviadzieńniem žančynaŭ da hołaha cieła, lepiej paźbiahać takoha pryjomu.
Julija Cimafiejeva kaža: «Jakoje dačynieńnie da piesiennaha konkursu majuć maŭklivyja paŭaholenyja žančyny, jakija samleła-pažadliva hladziać u abjektyŭ i hładziać instrumenty? Heta stary i zaciahany štamp — vykarystoŭvajuć žanočaje cieła dla reklamy luboj pradukcyi. U biełaruskaj muzycy dastatkova samastojnych, jarkich i talenavitych žančyn-muzykaŭ i śpiavačak, jakija jość nia prosta muzami, jany sami stvarajuć dobruju muzyku i, mabyć, taksama chacieli b paŭdzielničać u hetym konkursie, ale, na žal, atrymlivajecca, što mesydž hetaha klipa skiravany tolki na mužčynskuju aŭdytoryju».
Stvaralniki videa nie pahadzilisia z vysunutymi «abvinavačvańniami». «My chacieli pryciahnuć uvahu da konkursu, zrabić heta jarka, pryhoža. Ale pry hetym, nikoha nie abrazić i nie prynizić», — skazaŭ pradusar konkursu Siarhiej Budkin.
Režyser roliku Arciom Łobač zaznačyŭ, što jaho ŭsiaho tolki pryvabiła pryhožaje spałučeńnie formy žanočaha cieła dy vijałančeli i padziakavaŭ udzielnikam dyskusii za istotny fidbek.
U konkursie «Zaśpiavaj 3.0» z pryzavym fondam 1500 eŭra mohuć brać udzieł vykanaŭcy ad 16 da 33 hod. Pieravaha addajecca najpierš tym muzykam, jakija nia majuć aficyjna vydadzienych albomaŭ i solnych kancertaŭ. Zajavy prymajucca ŭ troch naminacyjach da 1 traŭnia. Padrabiaznaści – na staroncy pra konkurs.
