U Biełarusi płanujecca spraścić praceduru rehistracyi internet-resursaŭ, paviedamiła siońnia načalnik upraŭleńnia elektrasuviazi Minsuviazi Volha Fiedarejeva ŭ čas kruhłaha stała «Rehulavańnie haliny elektrasuviazi», jaki prajšoŭ u čas vystaŭki «TIBO-2016».
«Praceduru rehistracyi internet-resursaŭ płanujecca spraścić, adpaviednyja źmianieńni va ŭkaz numar 60 ciapier prachodziać zaviaršalnuju stadyju ŭzhadnieńnia ŭ zacikaŭlenych dziaržorhanach», — adznačyła Volha Fiedarejeva.
Prapanujecca ŭnieści źmianieńni ŭ častcy rehistracyi ŭ nacyjanalnych zonach.by i.bieł. «Siońnia ŭsie resursy rehistrujucca ŭ BiełDIE. Pry hetym resursy zony.bieł i.by jašče rehistrujucca ŭ orhanach, padviedamnych AAC. Atrymlivajecca dvajnaja rehistracyja, i płacić karystalnik taksama vymušany dvojčy», — raskazała načalnik upraŭleńnia elektrasuviazi.
Prapanujecca pakinuć rehistracyju resursaŭ u nacyjanalnym siehmiencie internetu ŭ viedańni AAC, a ŭsie astatnija resursy buduć rehistravacca ŭ BiełDIE.
Mižnarodnaja śpiecyjalizavanaja vystaŭka «TIBO-2016» prachodzić u Minsku z 19 pa 22 krasavika. U joj prymajuć udzieł bolš jak 100 kampanij z 18 krain (Biełaruś, Rasija, Ukraina, Kazachstan, Azierbajdžan, Litva, Łatvija, Polšča, Čechija, Hiermanija, Finlandyja, Šviecyja, Vialikabrytanija, Turcyja, Kitaj, Respublika Kareja, Japonija, ZŠA).
Vystaŭka «TIBO» prachodzić u čas mižnarodnaha śpiecyjalizavanaha forumu pa telekamunikacyjach, infarmacyjnych i bankaŭskich technałohijach «TIBO-2016».
