Na abviaščeńnie dziesiaci svaich dyplamataŭ personami non hrata Ameryka adreahavała jak zvyšdziaržava, što viedaje sabie canu. Pavodle Asašyejted Pres, dziarždep zajaŭlaje pra namier spynić pracu ambasady ZŠA ŭ Miensku i vyłučaje patrabavańnie začynić biełaruskuju dypmisiju ŭ Vašynhtonie.
Takim čynam, Vašynhton pakazvaje, što nia zhodny dalej hulać pavodle praviłaŭ Miensku, i raźviazvaje sabie ruki. Učora časovy pavierany Džonatan Mur užo kazaŭ pra mahčymaść novych ekanamičnych sankcyj. Uvohule varta čakać, što Ameryka jašče bolej pilna pačnie adsočvać, za što možna pryščamić biełaruski režym i jaho kankretnych persanalijaŭ (rachunki, handal zbrojaj i h.d.). Eŭraźviaz choć i nia pojdzie na ekanamičnyja sankcyi, ale budzie vymušany niejak demanstravać eŭraatlantyčnuju salidarnaść. Va ŭsiakim razie, dyplamatyčnaje hulni na eŭrapiejskim kirunku u biełaruskaha kiraŭnictva ciapier ŭžo dakładna nie atrymajecca.
Sa svajho boku, ajčynnaje kiraŭnictva pakul što pačuvajecca, musić, dastatkova ŭpeŭniena: Maskva nia vydaść, Buš nia źjeść! Navat jość, badaj, nadzieja atrymać niejkija pierniki za takuju samaachviarnuju antyamerykanskuju epapieju. Adnak takija raźliki naŭrad ci možna ličyć dalnabačnymi. Pa-pieršaje, kurs rasiejskaha kiraŭnictva na skaračeńnie datacyjaŭ Biełarusi niepachisny. Pa-druhoje, Maskva jaŭna nie śpiašajecca publična ŭchvalać hetuju dyplamatyčnuju vajnu, što jość symptomam: badacca sa Štatami za intaresy biełaruskaj kiroŭnaje elity, pa jakich udaryli sankcyi suprać "Biełhaftachimu", Kramlu zusim niecikava. I narešcie, kali Miadźviedzieŭ nieŭzabavie vyrašyć umacavać svoj imidž vychadam Rasiei z antyamerykanskaha trendu, to aficyjny Miensk kapitalna siadzie ŭ łužynu.
Ź inšaha boku, jašče bolšaja samaizalacyja na zachodnim kirunku abjektyŭna ŭzmacniaje ryzyki inkarparacyi, bo na niejkim etapie adzinym paratunkam dla tutejšych stratehaŭ mohuć akazacca miadźviedžyja abdymki imperyi.
Dyj ŭvohule torhać tyhra za vusy — zaniatak niaŭdziačny. Jak pakazvaje histaryčny dośvied, Ameryka ničoha nie zabyvaje i rana ci pozna znachodzić sposab davieści svaju pryncypovaść.
Na chutkaje ž ułahodžvańnie kanfliktu z Vašynhtonam spadziavacca ciažka. Chacia b tamu, što za apošnija tydni tut "pastaralisia" padoŭžyć śpis palitviaźniaŭ. I zaraz ZŠA patrabujuć vyzvalić užo nie adnaho, a traich.
ZY. Śviežaja navina: u apošniuju chvilinu amerykancy prytarmazili svajo rašeńnie. Vyhladaje na toje, što "demanstracyja zuboŭ" zrabiła ŭražańnie na biełaruski bok i zaraz ajčynnaja dyplamatyja sprabuje niejak źmiakčyć sytuacyju. Budziem sačyć za raźvićciom hetaha ŭžo amal što detektyŭnaha siužetu.
