Palicyja Kijeŭskaj vobłaści jašče ŭ śniežni minułaha hoda zakryła kryminalnuju spravu adnosna pošuku kaštoŭnaściaŭ, jakija źnikli z «Miežyhorja» paśla ŭciokaŭ eks-prezidenta Ukrainy Viktara Janukoviča.
Pra heta śviedčyć adkaz prakuratury Kijeŭskaj vobłaści na zapyt deputata Dźmitryja Dabradomava, jaki jon apublikavaŭ u svaim błohu na «Ukrainskaj praŭdzie».
«Śledčyja HPU, vidavočna, ličać mifam isnavańnie «załatoha batona» Janukoviča, znojdzienaha žurnalistami ŭ Miežyhorji ŭ lutym 2014 hoda. Inakš rastłumačyć fakt zakryćcia kryminalnaj vytvorčaści ab źniknieńni simvała karupcyi režymu Janukoviča mnie asabista ciažka», — aburyŭsia jon.
Adkaz Dabradomavu śviedčyć, što spravu zakryli z-za «adsutnaści ŭ dziejańni składu kryminalnaha pravaparušeńnia».
«Tamu majem dylemu: ci nie było ni «załatoha batona», ni inšych kaštoŭnaściaŭ ź Miežyhorja, jakija vyjavili žurnalisty, jakija byli pakazanyja ŭ TB-siužetach, i ŭ vyniku bačyła ŭsia kraina, ci ž pravaachoŭniki ich… znajšli. A kali tak, to na ŭliku jakoha viedamstva znachodziacca hetyja kaštoŭnaści koštam u miljony?» — dadaŭ Dabradomaŭ.
Jon taksama paabiacaŭ nakiravać aficyjny zapyt novamu hienprakuroru Juryju Łucenka, pacikaviŭšysia ŭ im, ci buduć pakaranyja tyja, chto zakryŭ hetuju spravu, a taksama tyja, chto zakryŭ spravu, dzie fihuravali eks-ministry i eks-premjer Arsień Jacaniuk.
Taksama Dabradomaŭ płanuje spytać Łucenku, «ci buduć daviedzienyja da łahičnaha finału spravy ab karupcyi ŭ byłym Kabiniecie, razbazarvańni i niametavym vykarystańni dziaržsrodkaŭ profilnymi ministerstvami».
Jak viadoma, Hienprakuratura ŭ krasaviku minułaha hoda daručyła palicyi Kijeŭskaj vobłaści rasśledavać spravu ab vykradańni kaštoŭnaściaŭ ź Miežyhorja.
