Drennym nazvaŭ vystupleńnie biełaruskaj chakiejnaj zbornaj na čempijanacie śvietu ŭ Rasii staršynia fiederacyi pa hetym vidzie sportu Ihar Račkoŭski.
«Paśla viartańnia ŭ Minsk my detalova raźbiarom vystupleńnie kamandy na turniry. Heta vielmi važna ŭličyć pry padrychtoŭcy da alimpijskaj kvalifikacyi, bo ŭžo praz paŭtara miesiaca zbornaja pačnie rychtavacca da hetaha startu. Nam treba zasvoić uroki i pravieści bolš jakasnuju pracu ŭ budučyni», — skazaŭ Račkoŭski, słovy jakoha pryvodzić pres-słužba FCHB.
«Šmat skazana pra naš kalandar na čempijanacie śvietu, — zaŭvažyŭ Račkoŭski, — adnak ja liču, prafiesijanały pavinny hulać pry lubym kalendary. Paśla taho jak pa kamandzie prajechali try tanki (Finlandyja — 2:6, ZŠA — 3:6, Kanada — 0:8), u nas byŭ najlepšy kalandar, pra jaki tolki možna maryć: było dastatkova paŭzaŭ pamiž hulniami, u toj čas jak našy sapierniki pravodzili sparanyja matčy i, zdavałasia b, pavinny byli padychodzić da našych pajadynkaŭ bolš stomlenymi». «Tak što kalandar — daloka nie asnoŭnaja pryčyna takoha vyniku», — ličyć kiraŭnik fiederacyi.
Račkoŭski vykazaŭ niezdavalnieńnie padrychtoŭkaj varataroŭ, «tamu jość peŭnyja pytańni da trenierskaha štaba, jaki adkazvaŭ za hety kirunak».
Jak raniej paviedamlałasia, biełaruskaja zbornaja zaniała šostaje miesca siarod vaśmi kamand papiaredniaj hrupy V i 12-je — siarod usich 16 udzielnikaŭ ČS. Zadačaj-maksimumam nazyvałasia zavajova miedaloŭ.
