Prezident Rasii Uładzimir Pucin unios u Dziarždumu zakonaprajekt, jaki praduhledžvaje źmiakčeńnie pakarańnia za ekanamičnyja złačynstvy, a taksama dekryminalizacyju niekatorych takich złačynstvaŭ.
U pryvatnaści, prapanujecca pašyryć pieralik złačynstvaŭ, pry jakich mahčyma vyzvaleńnie ad kryminalnaj adkaznaści — dadać u jaho roznyja niezakonnyja ździełki z kaštoŭnymi mietałami, niezakonnaje vykarystańnie čužoha tavarnaha znaka hrupaj asob i inšyja złačynstvy.
Uniesienyja Pucinym papraŭki praduhledžvajuć taksama źnižeńnie sumy hrašovaj kampiensacyi, jakuju parušalnik abaviazany pieraličyć u biudžet dla pazbaŭleńnia ad kryminalnaha pieraśledu.
Prapanujecca taksama padniać paroh naniesienaj škody, ź jakoha nastupaje kryminalnaja adkaznaść pradprymalnikaŭ. Naprykład, pavyšajecca suma bujnoj i asabliva bujnoj škody pa artykule pra niavypłatu mytnych płaciažoŭ.
Taksama zakon unosić źmieny ŭ paradak viadzieńnia śledstva i zaklučeńnia padazravanych: naprykład, biznesmienam, čyja svaboda abmiežavanaja, dazvolili bačycca z nataryusam.
Razam z tym zakanadaŭčaja inicyjatyva utrymlivaje i normy, jakija ŭ šerahu vypadkaŭ robiać bolš žorstkimi adkaznaść niadobrasumlennych pradprymalnikaŭ. Tak, artykuł KK ab machlarstvie Pucin prapanavaŭ dapoŭnić punktam ab naŭmysnym nievykanańni damovaŭ u pradprymalnickaj dziejnaści. Heta pahražaje štrafam da 300 tysiač rubloŭ (4,5 tysiačy dalaraŭ), pazbaŭleńniem voli na termin da 5 hadoŭ abo prymusovymi pracami.
U tłumačalnaj zapiscy da dakumienta havorycca, što adnoj ź jaho asnoŭnych metaŭ źjaŭlajecca stvareńnie ŭ krainie spryjalnaha biznes-klimatu.
