18-hadovaja śpiavačka prezentuje na Tuzin.fm EP «Usio atrymajecca», u jaki ŭvajšli try kampazycyi jaje aŭtarstva.
Adela kaža, što jana ŭžo daŭno piša pieśni, niekatorym jaje tvoram čatyry i bolej hadoŭ. Ale tolki ciapier jana vyrašyła abvieścić publična pra svaju tvorčaść. «Pisała pieśni ja dla siabie i nie źbirałasia vykładać ich u internet. Ale niadaŭna vyrašyła, što pavinna padzialicca svaim śvietapohladam ź ludźmi. Tamu pastupova zapisvajusia», – raspaviała śpiavačka Tuzin.fm z nahody premjery. Materyjału nabirajecca na paŭnavartasny albom, jaki Adela miarkuje nieŭzabavie vydać. A pakul jana prezentuje pieršyja try zapisanyja tvory – «Usio atrymajecca», «Adelka-sardelka» i «Cudoŭny śviet». Muzyka i słovy naležać aŭtarstvu Adeli.
«Ja natchniajusia zvyčajnymi paŭsiadzionnymi sytuacyjami, – raspaviadaje śpiavačka. – Naprykład, «Usio atrymajecca» była napisana padčas majho prabudžeńnia ŭ soniečny dzień – ja adčuła nieapisalnuju radaść i zrazumieła, što jak by nie było składana, usio adno ŭsio atrymajecca, kali čałaviek nasamreč hetaha vielmi choča. Taksama na hetuju pieśniu paŭpłyvła maja luboŭ da ludziej. Ludzi mianie vielmi natchniajuć: ich pozirki, žesty, maniera razmovy i enerhetyka».
Pieśnia «Adelka-sardelka» – adna z daŭniejšych. Jana źjaviłasia ŭ 2012 hodzie. «Stvaryła ja jaje, kali ŭva mnie pračnułasa vostraje žadańnie – być zaŭsiody maleńkaj dziaŭčynkaj. A vyrašyła nazvać jaje tak, tamu što takoj mianuškaj nazyvaŭ mianie tata ŭ dziacinstvie, i ja zaŭsiody złavałasia, kali jon mianie tak nazyvaŭ, bo ličyła, što jon mianie abražaje. Ale zaraz hetaja mianuška dla mianie, jak ciopły ŭspamin ź dziciačych časoŭ majho žyćcia».
Treciuju kampazycyju – «Cudoŭny śviet» Adela napisała paśla špacyru pa horadzie: «Vielmi lublu hulać na samocie i nasyčacca zvyčajnymi pryrodnymi źjavami: soniejkam, vietram, daždžom i h.d. Padčas takich špacyraŭ ja adčuvaju siabie vielmi ščaślivaj, bo razumieju, što naš śviet cudoŭny».
Pakul muzyčny prajekt Adeli Volskaj isnuje ŭ studyjnym farmacie. Žyvyja vystupy nie planujucca.
