Damy 6, 6a na vulicy Vyzvaleńnia ŭ Minsku nie vyklučanyja sa śpisu historyka-kulturnych kaštoŭnaściaŭ. Heta vynikaje z pastanovy Savieta ministraŭ ad 2 žniŭnia.
Fota Siarhieja Hudzilina.
Sa śpisu vyklučana bolš za sto abjektaŭ, u asnoŭnym heta haradziščy i kurhannyja mohilniki, dzie kaliści pravodzilisia raskopki. Ź minskaj spadčyny vyklučany tolki dom pa vulicy Haradski Vał, 5.
U sakaviku sioleta mitrapalit Minski i Zasłaŭski Pavieł źviartaŭsia da vice-premjera Natalli Kačanavaj dać dazvoł na vyklučeńnie damoŭ na adrasie vuł. Vyzvaleńnia, 6 i 6a sa śpisu historyka-kulturnaj spadčyny.
«Pakolki jany nie majuć nijakaha histaryčnaha značeńnia i nie ŭjaŭlajuć kulturnaj ci architekturnaj značnaści», — upeŭniena śćviardžaŭ mitrapalit Pavieł.
«Pastanova Savieta ministraŭ — heta plony pracy navat nie adnaho hoda, — kaža kiraŭnik Biełaruskaha dobraachvotnaha tavarystva achovy pomnikaŭ historyi i kultury Anton Astapovič. — My nakiroŭvali svaje prapanovy pa ŭdaskanaleńni śpisu i ŭ 2012, i ŭ 2013, i ŭ 2014 hadach. Ciapier status historyka-kulturnych kaštoŭnaściaŭ zamacavanyja za 14 abjektami, jakija prapanavała mienavita naša Tavarystva achovy pomnikaŭ. Što tyčycca damkoŭ na vulicy Vyzvaleńnia, to, nakolki mnie viadoma, navukova-mietadyčnaja rada pry Minkulcie navat nie razhladała mahčymaść ich vyklučeńnia sa śpisu».
Pavieł nie chavaŭ, što BPC źbirałasia źnieści budynki na vulicy Vyzvaleńnia, a na hetym miescy ŭźvieści chram Uvaskrasieńnia, a taksama administracyjnyja budynki Biełaruskaha ekzarchata. Adnak paśla taho, jak prośba mitrapalita Paŭła była ahučanaja publična, na jaje stali reahavać dziaržaŭnyja čynoŭniki.
Načalnik upraŭleńnia pa achovie historyka-kulturnaj spadčyny i restaŭracyi Minkultury Ihar Čarniaŭski jašče ŭ krasaviku zapeŭniŭ, što jaho viedamstva razhladaje mahčymaść adnaŭleńnia budynkaŭ.
«Try budynki ŭjaŭlali pamiž saboj cikavy kompleks. Nie ŭjaŭlajuć histaryčnaj kaštoŭnaści? Ale paasobnyja budynki vakoł Notr-Dam de Pary nibyta taksama nie ŭjaŭlajuć nijakaj kaštoŭnaści, a razam stvarajuć niepaŭtorny ansambl. Hetak možna zrujnavać pałovu Ryma, kali iści takoj łohikaj. U Vilni pałovu damoŭ možna hrochnuć», — skazaŭ znaŭca historyi Minska Siarhiej Chareŭski.
Jak bačym, damki ŭdałosia adstajać, ciapier pytańnie za restaŭracyjaj.
