U intervju Pieršamu kanału ministr zamiežnych spraŭ Rasii Siarhiej Łaŭroŭ zajaviŭ, što ŭ asnovie palityki ZŠA ŭ dačynieńni da Maskvy lažyć «ahresiŭnaja rusafobija».
Reuters
Łaŭroŭ adznačyŭ, što dziejańni amierykanskich uładaŭ — heta nie prosta «rytaryčnaja rusafobija», a ahresiŭnaja pazicyja, u ramkach jakoj Vašynhton robić zachady, jakija zakranajuć nacyjanalnyja intaresy Rasii i staviać pad pahrozu jaje biaśpieku.
«Heta nabližeńnie NATA i jaje vajennaj infrastruktury da našych miežaŭ, razhortvańnie tam amierykanskich ciažkich uzbrajeńniaŭ, avijacyi Paŭnočnaatłantyčnaha aljansu, SRA, pryčym u jaje jeŭrapiejskim i azijackim siehmiencie pa pierymietry našych miežaŭ i miežaŭ našych sajuźnikaŭ», — skazaŭ Siarhiej Łaŭroŭ u intervju.
Pa słovach ministra, rasijski bok daŭno prajaŭlaŭ «toje, što amierykancy nazyvajuć» stratehičnym ciarpieńniem «— bo paharšeńnie adnosin u adnabakovym paradku z boku amierykancaŭ pačałosia zadoŭha da Ukrainy».
Akramia taho, Łaŭroŭ adznačyŭ, što ZŠA sistematyčna nie vykonvajuć svaich abaviazacielstvaŭ u ramkach siryjskich pahadnieńniaŭ.
Abvastreńnie ŭ adnosinach pamiž Vašynhtonam i Maskvoj pačałosia ŭ paniadziełak, kali amierykanski bok abviaściŭ ab spynieńni farmalnych pieramoŭ z Rasijaj pa Siryi, nazvaŭšy avijaŭdary pa žyłych kvartałach Alepa vajennym złačynstvam.
U toj ža dzień Uładzimir Pucin apublikavaŭ ukaz ab prypynieńni pahadnieńnia z ZŠA ab utylizacyi płutoniju z-za «niedružalubnych dziejańniaŭ amierykanskich uładaŭ».
U sieradu, 5 kastryčnika, rasijski ŭrad abviaściŭ ab spynieńni supracoŭnictva z ZŠA ŭ ramkach navukovych daśledavańniaŭ u jadziernaj i enierhietyčnaj śfierach.
