Premija Hiedrojca 2016 h. jašče nie dajechała da Prahi, dzie ŭžo amal dvaccać hadoŭ žyvie biełaruski piśmieńnik Maks Ščur, jak ad jaho pryjšła prapanova vydańnia čarhovaj zahadkavaj knihi. Na hety raz łaŭreat samaj prestyžnaj litaraturnaj uznaharody ŭ Biełarusi schavaŭsia pad psieŭdanimam.
Apovied u tvory viadziecca ad imia Andrusia Makatoŭšy — prazaika, čyj litaraturny debiut «Upyrchliki» adbyvajecca ŭžo paśla jahonaha zaŭčasnaha sychodu (źniknieńnia bieź viestak) z realnaha žyćcia. U stylizavanym pad aŭtabijahrafiju tvory były emihrant apisvaje svaje harotnyja pryhody na Radzimie i pa-za jaje miežami.
Maks Ščur u knizie vystupaje jak redaktar, aŭtar kamientaroŭ i paślamovy. «Rable, Servantes, Hrymelshaŭzen, Valter, Kazanova, Stern, Mojchier-Sforym, Prust, nie kažučy ŭžo pra tak zvany pikareskny (ci prajdziśviecki) raman — usio heta nie mahło nie paŭpłyvać na apovieść, jakaja ŭ biełaruskaj litaratury hodna praciahvaje satyryčnyja tradycyi Andreja Mryja i Lavona Savionka ŭ spałučeńni sa spaviadalnaj tradycyjaj Łarysy Hienijuš», — adznačaje jon.
Poŭny zahałovak knihi vyhladaje intryhujuča: «Praŭdzivaje apisańnie kapitalizmu ŭ adnoj asobna ŭziataj krainie Zachadu, składzienaje ad niama čaho rabić rabom Božym Andrusiom Makatoŭšam, błudnym synam i ŭnukam, plamieńnikam Bazylovym, biełaruscam z-pad Navahradka, vałacuham i prajdziśvietam»
Asobnyja raździeły knihi drukavalisia ŭ časopisie «Arche» u 2014 hodzie (№10 (131)).
U poŭnym abjomie jana źjaviłasia ŭ prodažy tolki ŭ elektronnaj viersii na partale kniharnia.by.
