Uviadzieńnie ŭ Biełarusi «padatku na darmajedstva» ŭ situacyi, jakaja skłałasia, było samym prostym, ale nie samym efiektyŭnym zachadam, ličyć pieršy namieśnik ministra finansaŭ Maksim Jermałovič. Takoje mierkavańnie jon vykazaŭ 4 listapada ŭ Minsku na Kastryčnickim ekanamičnym forumie.
Jermałovič padkreśliŭ, što ŭviadzieńnie zboru na finansavańnie dziaržvydatkaŭ vyklikała dastatkova vialikuju dyskusiju ŭ hramadstvie, ale «siońnia heta elemient našaj padatkovaj sistemy».
«Była prablema, jakuju nieabchodna było vyrašać. I rašeńnie samaje prostaje, moža być, nie samaje efiektyŭnaje, ale tym nie mienš znajšłosia. Byŭ uviedzieny taki padatak. Viadoma, uviadzieńnie hetaha padatku, zdavałasia b, upłyvaje na palityku zaniataści, ale, zapeŭnivaju vas, biespracoŭnyja hetym padatkam nie abkładajucca — u hetym niama jaho niedachopu. Toj, chto zarehistravany jak biespracoŭny, atrymlivaje dapamohu pa biespracoŭi, nie płacić padatak», — zajaviŭ Jermałovič.
Načalnik upraŭleńnia palityki zaniataści Minpracy i sacabarony Aleh Takun źviarnuŭ uvahu na stanoŭčy efiekt padatku dla ekanomiki. «Što daŭ dekret № 3 dla słužby zaniataści? Situacyja vielmi prostaja. Naprykład, u 2015 hodzie ŭ asobnyja miesiacy da 35% dachodziła kolkaść biespracoŭnych (zarehistravanych), jakija doŭhi čas, 10—15 hadoŭ, nie pracavali. Heta byli mienavita tyja ludzi, jakija vyleźli ź siektara niefarmalnaj zaniataści i vyrašyli niejak lehalizavacca. Peŭnaja karyść ad hetaha, biezumoŭna, była i jość, tamu što jany ŭbačyli, što možna pracavać lehalna, zarehistravaŭšy IP ci staŭšy ramieśnikami», — skazaŭ jon.
