Biełaruski bok zaprašaje turecki biźnies da ŭdziełu ŭ pryvatyzacyjnych ździełkach, paviedamiŭ Alaksandr Łukašenka 11 listapada ŭ Minsku na biełaruska-tureckim biźnies-forumie, jaki prajšoŭ u ramkach vizitu ŭ Biełaruś prezidenta Turcyi Redžepa Taipa Erdahana.
«Biełaruś prapanoŭvaje dobryja mahčymaści dla raźvićcia biźniesu, źviazanyja z aktyvizacyjaj u krainie pracesu pryvatyzacyi», — skazaŭ kiraŭnik dziaržavy.
Łukašenka nahadaŭ, što dola dziaržułasnaści ŭ biełaruskim pramysłovym siektary dasiahaje 70%. «U adroźnieńnie ad Rasii i inšych krain SND, Biełaruś zachavała najbolš bujnyja nacyjanalnyja pradpryjemstvy ŭ dziaržułasnaści, što dazvoliła akazvać im paŭnavartasnuju padtrymku. U vyniku istotna pavyšany ich vytvorčy patencyjał, kankurentazdolnaść na suśvietnych rynkach», — padkreśliŭ jon.
Kiraŭnik dziaržavy ŭ suviazi z hetym źviarnuŭ uvahu tureckich biźniesmienaŭ na praktyku biełaruskaj kropkavaj pryvatyzacyi. U jakaści prykładu ŭdałych pryvatyzacyjnych ździełak, jakija «ŭvajšli ŭ lik samych bujnych u Jeŭropie», Łukašenka nazvaŭ prodaž dziarždoli ŭ «Biełtranshazie» i inšyja.
«U nas užo jość vopyt padtrymki maštabnych prajektaŭ, što realizujucca tureckimi kampanijami, — adznačyŭ kiraŭnik dziaržavy. — Kali vy chočacie sumlenna i hodna zajmacca biźniesam u Biełarusi, davajcie jaho budavać na vyklučna prystojnaj asnovie, niekarupcyjnaj, adkrytaj, sumlennaj i pryncypovaj. Prychodźcie ŭ Biełaruś pracavać z takim nastrojem, jak vy pracujecie ŭ Turcyi, i tady ŭ nas usio atrymajecca».
«My budziem dobraj aporaj i placoŭkaj dla vašaha biźniesu. I kali my damovimsia, vy budziecie ŭ nas, jak usie biełaruskija kampanii, — my budziem vas zaŭsiody padtrymlivać i budziem zaŭsiody abaraniać. Vy budziecie našymi ludźmi na našaj terytoryi. Kali vam heta treba, kali vy bačycie svoj biźnies u Biełarusi abo praź Biełaruś — prychodźcie i prapanoŭvajcie svaje pasłuhi», — zajaviŭ Łukašenka.
