Šmatfunkcyjanalny duchoŭna-aśvietnicki kompleks budynkaŭ Biełaruskaj pravasłaŭnaj carkvy płanujuć pabudavać u histaryčnym centry Minska ŭ miežach vulic Vyzvaleńnia-Špalernaja. Ciapier tam znachodzicca Minskaje Jeparchijalnaje ŭpraŭleńnie BPC. Novy kompleks budzie złučany ź im nadziemnaj halerejaj.
Tut i nižej fota Siarhieja Hudzilina
U administracyi Centralnaha rajona pačałosia hramadskaje abmierkavańnie spravazdačy ab acency ŭździejańnia budaŭnictva kompleksu na navakolnaje asiarodździe.
Pavodle spravazdačy płošča zajmanaj abjektam terytoryi 5138 kvadratnych mietraŭ, u miežach rabot — 7000 kvadratnych mietraŭ.
Hałoŭnym abjektam u składzie kompleksu stanie 3-4-paviarchovy administracyjny budynak z padziemnym parkinham. Z druhim administracyjnym budynkam i ŭžo isnujučym Minskim jeparchijalnym upraŭleńniem kompleks budzie złučacca praz nadziemnuju halereju.
Meta budaŭnictva kompleksu — kampaktnaje raźmiaščeńnie kiraŭničaha i absłuhoŭvajučaha piersanału Minskaj jeparchii ŭ adnym kompleksie budynkaŭ. U administracyjnym budynku z parkinham miarkujecca raźmiaščeńnie pracoŭnaha kabinieta mitrapalita, pamiaškańniaŭ Upraŭleńnia BPC, šmatfunkcyjanalnaj zały na 450 miescaŭ, sinadalnaj zały, dapamožnych słužbaŭ, asnoŭnaj trapieznaj, kramy carkoŭnych prynaležnaściaŭ, infarmacyjnaha centra. U «małym» administracyjnym budynku — pracoŭny kabiniet pamočnika mitrapalita, pamiaškańniaŭ piersanału, techničnych pamiaškańniaŭ, numary dla hanarovych haściej. Dla pamianšeńnia płoščy abjekta słužbovy parkinh na 35 mašyna-miescaŭ arhanizavany ŭ padziemnym paviersie.
Zhodna z AUNA varyjant raźmiaščeńnia kompleksu mienavita ŭ hetaj častcy horada pryniaty jak aptymalny «z ulikam vykarystańnia sumiežnaha ŭčastka terytoryi dla raźmiaščeńnia administracyi Minskaj jeparchii BPC, jaki histaryčna skłaŭsia, adsutnaści nieabchodnaści ŭ dadatkovych advodach ziamli, vyhody padjezdu, poŭnaha inžyniernaha zabieśpiačeńnia placoŭki: blizkaść mahistralnaha hazapravoda, najaŭnaść sietki vadapravoda, kanalizacyi, elektrazabieśpiačeńnia».
Pryčynami vybaru hetaha ŭčastka taksama tłumačać minimalnyja adlehłaści pierasoŭvańniaŭ supracoŭnikaŭ abjekta i materyjalnych patokaŭ pamiž budynkami, zručnaje transpartnaje raźmiaščeńnie, blizkaść mietrapalitena, najaŭnaść parkovačnych miescaŭ dla haściavoha aŭtatranspartu pa vuł. Špalernaj, Rakaŭskaj, Vyzvaleńnia, zručnaje raźmiaščeńnie adnosna miescaŭ kancentracyi i prybyćcia rabočaj siły na abjekt, najaŭnaść usich nieabchodnych inžyniernych sietak, najaŭnaść 17-20-mietrovaha razryvu da žyłoj zabudovy, jaki zabiaśpiečvaje dadatkovaje źnižeńnie hukavoha ŭździejańnia.
Inšyja varyjanty raźmiaščeńnia kompleksu, na dumku prajekciroŭščykaŭ, patrabujuć adviadzieńnia dadatkovych svabodnych ziamiel na terytoryi Minska, pryvodziać da pavieličeńnia transpartnych i kamunikacyjnych vydatkaŭ u pieryjad ekspłuatacyi, što, adpaviedna, ciahnie za saboj źnižeńnie efiektyŭnaści inviestycyj u budaŭnictva i pavieličeńnie terminu akupnaści ich układańniaŭ. Varyjant admovy ad płanavanaha budaŭnictva taksama nie razhladaŭsia.
Kab pabudavać kompleks, źniasuć dva budynki kanca XIX stahodździa
Pad plamaj płanavanaj zabudovy znachodziacca dva budynki kanca XIX stahodździa: № 6 i 6a pa vuł. Vyzvaleńnia.
Abodva budynki znachodziacca ŭ pieradavaryjnym stanie i vyznačany pad znos, z zachavańniem častki aryhinalnych kanstrukcyj. Na miescy ŭźviadzieńnia budynka № 1 pa prajekcie znachodzicca budynak byłoha vajenkamata i pabudovy jaho haspadarčaj častki. Usie budynki i zbudavańni na hetaj plamie zabudovy taksama vyznačanyja pad znos.
Čytajcie taksama: Mitrapalit Pavieł prosić u vice-premjera Kačanavaj dazvoł na źniščeńnie histaryčnych damkoŭ u centry Minska
Prajekciroŭščyki ličać, što arhanizacyja prastory na ŭčastku isnujučych budynkaŭ № 6 i 6a pa vuł. Vyzvaleńnia i znos budynka byłoha vajenkamata palepšać estetyčnaje ŭsprymańnie hetaj častki horada, pavysiać jaho turystyčnuju pryvabnaść, likvidujuć chaatyčnuju isnujučuju staruju zabudovu i nievykarystoŭvanyja haspadarčyja pabudovy.
Z sacyjalna-ekanamičnaha punktu hledžańnia realizacyja prajekta «akaža stanoŭčy ŭpłyŭ na ekanomiku Minska i Centralnaha rajona. U pryvatnaści, budzie stvorana 40 pastajannych pracoŭnych miescaŭ sa stabilnaj zarabotnaj płataj, nasielnictva atrymaje dadatkovyja mahčymaści aznajamleńnia ź infarmacyjaj pa relihijnaj tematycy, źjavicca dadatkovaja krynica pastupleńnia srodkaŭ u miascovy biudžet ad vypłaty padatkaŭ pry realizacyi pradukcyi ŭ kramie».
Zrabili ŭ spravazdačy i prybliznuju acenku ekanamičnaha efiektu. Naprykład, za prodaž tavaraŭ u kramie carkoŭnych prynaležnaściaŭ vałavaja vyručka abjekta składzie da 5000 biełaruskich rubloŭ u hod. A za košt stvareńnia dadatkovych pastajannych pracoŭnych miescaŭ z uzroŭniem zarabotnaj płaty 180-200 dalaraŭ u miesiac suma hadavych pastupleńniaŭ u biudžet ad vypłaty padachodnaha padatku, jak padličyła carkva, składzie 22 200 — 22 400 biełaruskich rubloŭ u hod.
U pracesie budaŭnictva, jak i ŭsiudy, praduhledžanaja vysiečka: 56 liścianych dreŭ (43 liścianych dekaratyŭnych i 13 pładovych) i 34 kusty. Uličvajučy nieabchodnaść zachavańnia ŭ haradskoj zabudovie abjektaŭ raślinnaha śvietu, prajektam prapanavana zachavać 49 dreŭ i 131 kust i pierasadzić 17 dreŭ i 39 kustoŭ. Kampiensacyjnyja pasadki taksama praviaduć: pasadziać 82 marudnarosłyja liścievyja drevy i 76 kustoŭ.
Ahulnaja intensiŭnaść ŭździejańnia abjekta na atmaśfiernaje pavietra aceńvajecca jak «niaznačnaja». Niehatyŭnaha ŭździejańnia na abjekty žyviolnaha śvietu pry realizacyi prajekta i ŭ pracesie ekspłuatacyi administracyjnaha kompleksu nie čakajecca.
Čytajcie taksama: Minkult ustaŭ na abaronu histaryčnych budynkaŭ u Minsku, jakija choča źnieści BPC
Hramadskaje abmierkavańnie spravazdačy praciahniecca pa 28 śniežnia. Aznajomicca ź im možna ŭ kabiniecie № 402 administracyi Centralnaha rajona. Usie svaje zaŭvahi i prapanovy ŭ piśmovaj formie pa vystaŭlenym na hramadskaje abmierkavańnie abjektu da 28 śniežnia možna nakiroŭvać u administracyju Centralnaha rajona z pamietkaj «hramadskaje abmierkavańnie» (paštovy adras: 220 004, h. Minsk, vuł. Mielnikajte, 6; elektronny adras: cen. [email protected]).
