Rezalucyja Hienasamblei AAN zaklikaje Rasieju jak dziaržavu-akupanta vykonvać svaje zabaviazańni ŭ adpaviednaści ź mižnarodnym pravam
Hienieralnaja Asambleja AAN u paniadziełak zaćvierdziła rezalucyju ab situacyi z pravami čałavieka ŭ Aŭtanomnaj Respublicy Krym i horadzie Sievastopal (Ukraina), prajekt jakoj byŭ pryniaty 15 listapada ŭ Trecim kamitecie Arhanizacyi.
Hałasavańnie adbyłosia ŭ paniadziełak u ramkach 65-j plenarnaj sustrečy Hienasamblei AAN u Ńju-Jorku.
Vynik hałasavańnia nastupny: «za» — 70, «suprać» — 26 pry 77 tych, chto ŭstrymaŭsia.
Dakumient asudžaje surjoznyja parušeńni i złoŭžyvańni ŭ adnosinach da žycharoŭ Kryma, uklučajučy pazasudovyja zabojstvy, vykradańni ludziej, palityčna matyvavany kryminalny pieraśled, dyskryminacyju, zapałochvańnie, hvałt, katavańni i inšyja parušeńni pravoŭ čałavieka ŭ Krymie.
Rezalucyja zaklikaje Rasieju jak dziaržavu-akupanta vykonvać svaje zabaviazańni ŭ adpaviednaści ź mižnarodnym pravam i vyzvalić nieadkładna ŭkrainskich hramadzian, jakija byli niezakonna zatrymanyja i asudžanyja biez uliku elemientarnych normaŭ pravasudździa.
Dakumient taksama źmiaščaje zvarot va Upraŭleńnie Viarchoŭnaha kamisara AAN pa pravach čałavieka adnosna padrychtoŭki spravazdačy pa situacyi na Krymskim paŭvostravie.
Siarod inšaha, u rezalucyi havorycca pra nieabchodnaść zabieśpiačeńnia z boku akupacyjnych uładaŭ RF bieśpieraškodnaha dostupu mižnarodnym pravaabaroncam, u tym liku, dziejučym pad ehidaj AAN.
Biełaruś hałasavała suprać rezalucyi. Suprać taksama hałasavali Kitaj, Indyja, Iran, Armienija, Kazachstan, Sierbija, Filipiny.
Za rezalucyju prahałasavali ZŠA, krainy Jeŭrasajuza, Kanada, Turcyja, Izrail, Japonija, Čarnahoryja, Narviehija.
Ustrymalisia takija, krainy, jak Brazilija, Pakistan, Indanezija, Mieksika, Tajłand, Tadžykistan, Manholija.
