Ułady Kitaja sprabujuć strymać samuju niebiaśpiečnuju z 2013 hoda epidemiju ptušynaha hrypu ŭ krainie. Sa studzienia prynamsi 87 čałaviek pamierli ŭ Kitai ad hetaj chvaroby. Usiaho ŭ krainie zafiksavana bolš za 260 vypadkaŭ zachvorvańnia virusam H7N9, piša VVS.
Ułady pačali zakryvać ptušynyja rynki ŭ paŭdniovych i centralnych rehijonach krainy. Uviedzienyja pavyšanyja miery kantrolu pry transparciroŭcy ptušak.
Pa słovach kitajskich uładaŭ, bolšaść vypadkaŭ zaražeńnia na hryp — vynik kantaktaŭ sa svojskaj ptuškaj. Čaściej za ŭsio heta adbyvajecca na rynkach abo fiermach.
Ciapier ułady prosiać nasielnictva paźbiahać niepasrednych kantaktaŭ z ptuškami.
Rabotnikaŭ achovy zdaroŭja vučać raspaznavać rannija simptomy ptušynaha hrypu.
Sioleta virus mienš vyrazna prajaŭlaje siabie ŭ svojskaj ptuški. Časta simptomy zastajucca niezaŭvažnymi. Pry hetym u ludziej zachvorvańnie praciakaje ŭ bolš ciažkaj formie i čaściej, čym raniej, pryvodzić da śmierci.
Ekśpierty krytykujuć ułady Kitaja za toje, što jany niedastatkova apieratyŭna reahujuć na epidemiju.
Čatyry hady tamu ŭ Kitai adbyłasia bujnaja ŭspyška ptušynaha hrypu, jakaja zabrała žyćci niekalkich dziasiatkaŭ čałaviek. Tady ŭ krainie pačałasia panika: ludzi chadzili pa vulicach u maskach, masava źniščałasia svojskaja ptuška, mnohija kitajcy imknulisia nie naviedvać hramadskija miescy.
Kurycu pryjšłosia prybrać ź mieniu škoł i charčavańnia na samalotach. Mnohija kitajcy admaŭlalisia ad miasa ptuški z-za strachu zachvareć na hryp.
Pakul u krainie niama takoj paniki, piša Rejter. Mnohija kitajcy i rabotniki sietak restaranaŭ chutkaha charčavańnia zajavili ahienctvu, što nie viedali, nakolki bujnoj akazałasia ciapierašniaja ŭspyška ptušynaha hrypu.
