Ranicaj 1 sakavika praciŭnikaŭ budoŭli kala Kurapat pryniaŭ staršynia Minharvykankama Andrej Šorac. Na sustreču sa staršynioj byli delehavanyja čatyry čałavieki: Marat Haravy ad ekśpiertaŭ, Juryj Ściepaniščaŭ ad žycharoŭ vulicy Miaršničenki i palityki Alaksiej Janukievič dy Pavieł Sieviaryniec.
Padtrymać pratestoŭcaŭ taksama pryjšli pres-sakratar HA BAŽ Barys Harecki, błohier Anton Matolka, aktyvistka Nina Bahinskaja dy jašče dziasiatak minčukoŭ.
U vyniku da Šorca siońnia prapuścili tolki čatyroch čałaviek biez žurnalistaŭ i ekśpiertaŭ. Astatnija zastalisia čakać vynikaŭ na ŭvachodzie ŭ meryju.
Jak paviedamili ŭdzielniki sustrečy žurnalistam, padčas hutarki staršynia Minharvykankama paabiacaŭ, što jak minimum tydzień budaŭnictva nie budzie vieścisia. Pytańnie budzie dalej vyvučacca ŭ profilnych viedamstvach.
Nahadajem, što pratesty na budaŭničaj placoŭcy la Kurapataŭ tryvajuć druhi tydzień. Žychary Minska pratestujuć suprać pabudovy ofisnaha centra na placoŭcy, jakaja da 2014 hoda ŭvachodziła ŭ achoŭnuju zonu Kurapataŭ i była vyviedzienaja ź jaje zadniaj dataj, paśla taho, jak u 2013 hodzie zabudoŭnik atrymaŭ prava na placoŭku.
U vyniku pratestaŭ budaŭnictva zamarožanaje ź minułaj piatnicy, častka techniki vyviedzienaja.
Ciapier na «Tałace.baj» pa inicyjatyvie staršyni kamisii sojma pa Kurapatach i Čarnobyli Alesia Čacholskaha startavaŭ zbor srodkaŭ na rekanstrukcyju kryžovaha pierymietra narodnaha miemaryjała «Kurapaty».
«Ideja pra miemaryjał u Kurapatach čynoŭnikami ŭžo ŭspryniataja, ale, što tyčycca spynieńnia budaŭnictva pobač, jany nastojvajuć na tym, što ŭsio tam zakonna. Kiraŭnictva harvykankama taksama prasiła prypynić dziejnaść razhornutaha łahiera, adnak my jaskrava dali zrazumieć: heta mahčyma tolki tady, kali na rukach u nas budzie piśmovaje rašeńnie pa skasavańni budaŭničych rabot», — raspavioŭ Pavieł Sieviaryniec.
