Ministerstva abarony RF adpravić maładych ludziej z akupavanaha Kryma na słužbu ŭ vojska ŭ roznyja rehijony Rasii. Pra heta, spasyłajučysia na rasijskija ŚMI, piša ZN.ua.
Adznačajecca, što heta adbudziecca ŭpieršyniu z času pačatku akupacyi Kryma ŭ 2014 hodzie, raniej krymčan pakidali na słužbie ŭ miežach paŭvostrava.
«U asnoŭnym pryzyŭniki Kryma buduć słužyć u Krasnadarskim krai, Maskoŭskaj vobłaści, Ivanaŭskaj vobłaści. Prachodzić vajennuju słužbu ŭ inšych rehijonach pakul budzie nievialikaja dola pryzyŭnikoŭ», — rastłumačyŭ načalnik arhanizacyjna-mabilizacyjnaha ŭpraŭleńnia štaba Paŭdniovaha vajennaj akruhi RF hienierał-major Andrej Kolesaŭ.
Pavodle jaho infarmacyi, na terytoryi akupavanaha Kryma ŭ viasnovuju kampaniju vajennyja kamisaryjaty abaviažuć słužyć u armii RF 2,4 tysiačy čałaviek, tady jak za ŭvieś 2016 hod na vajennuju słužbu na paŭvostravie byli nakiravanyja 3680 krymčan. Pryzyŭ na słužbu ŭ vojska ŭ RF pačynajecca ŭžo 1 krasavika.
U adpaviednaści z pryniataj rezalucyjaj AAN ab pravach čałavieka ŭ akupavanym Krymie, rasijskim akupantam zabaroniena zaklikać va ŭzbrojenyja siły žycharoŭ ukrainskaha paŭvostrava, zajaviŭ raniej ministr zamiežnych spraŭ Ukrainy Pavieł Klimkin.
«Chaču asobna padkreślić, što rezalucyja nastojvaje na zabaronie pryzyvu va ŭzbrojenyja siły krainy-akupanta na akupavanaj terytoryi. Tam utrymlivajecca zaklik da krainy-akupanta ŭ adpaviednaści ź mižnarodnym pravam», — skazaŭ Klimkin.
