Alaksandr Stachoŭski, fota Ułada Šviadoviča
Spačatku Alaksandr Stachoŭski vystaviŭ minčancy vialikuju canu za pajezdku ŭ 10 kiłamietraŭ, potym paabiacaŭ viarnuć hrošy, a niadaŭna stała viadoma, što jon źviarnuŭsia ŭ Frunzienskaje RUUS. Jon prosić znajści klijentku, pakarać za paklop i źbirajecca źviarnucca ŭ sud z pazovam ab abaronie honaru i hodnaści.
— Mnie zdavałasia, užo ŭsie zabylisia pra hetuju historyju, ale tut razdajecca zvanok z Frunzienskaha RUUS. Akazałasia, taksist prosić vyśvietlić maju asobu, kab źviarnucca ŭ sud z pazovam ab abaronie honaru i hodnaści. Ja vielmi doŭha śmiajałasia, — kamientuje Alaksandra. — Navat nie ŭjaŭlaju, čym jon kiravaŭsia, padajučy na mianie zajavu ŭ milicyju. Mabyć, ščyra ličyć, što maje racyju. Nu što ž, ubačymsia ŭ sudzie.
Nahadajem, 11 sakavika staličny taksist Alaksandr Stachoŭski za ličanyja chviliny staŭ viadomym u sacsietkach. Kala minskaha HC «Zamak» minčanka pasadziła ŭ sałon taksi dzicia ź nianiaj i pajšła pa spravach, a praź niekatory čas niania joj paviedamiła: pajezdka da vulicy Varanianskaha abyšłasia ŭ 63 rubli! Krychu paźniej taksist paviedamić Alaksandry: pierad pajezdkaj jana źviarnuła ŭvahu na lhotny taryf dla invalidaŭ, nasamreč jaho taryf inšy. Alaksandra apisała toje, što adbyłosia ŭ fejsbuku, i apublikavała fota taksista.
Paśla hetaj historyi taksist daŭ niekalki intervju, navat vykłaŭ u sietku videa, jak Alaksandra sadziła ŭ sałon dzicia ź nianiaj. Stachoŭski, jon ža staršynia prafsajuza taksistaŭ «Centr», adrazu zapeŭnivaŭ: nijakaha padmanu niama, taryf dla zvyčajnych pasažyraŭ byŭ pakazany krychu nižej, klijentu treba ŭvažliva vyvučać ceny. Krychu paźniej na ŭsiu krainu abiacaŭ viarnuć hrošy Alaksandry, udakładniŭšy: usio, što adbyvajecca — pijar-kampanija i jon sprabavaŭ pryciahnuć uvahu da prablemy taksistaŭ.
U paniadziełak uviečary staršy ŭčastkovy milicyjant Pavieł Kavalčuk zaprasiŭ Alaksandru ŭ aporny punkt. Jon padrabiazna pytaŭsia ŭ jaje pra padziei 11 sakavika, a zatym pakazaŭ zajavu taksista.
«Na padstavie asobnaj častki (KaAP, a mienavita artykuła 9.2) prašu pryciahnuć da administracyjnaj adkaznaści raniej nie viadomuju mnie asobu, jakaja 11 sakavika raźmiaściła infarmacyju ŭ sietcy internet, što raspaŭsiudžvaje zahadzia łžyvyja vydumki. A taksama vyśvietlić šlacham praviadzieńnia dadatkovych pracesualnych dziejańniaŭ asobu hramadzianina dla realizacyi maich pravoŭ u sudzie», — havorycca ŭ zajavie Stachoŭskaha.
Pa art. 9.2 KaAP «Paklop» pahražaje štraf da tryccaci bazavych vieličyń. Taksist nie ŭdakładniaje, jak mienavita jaho abhavaryli, adnak da svajoj zajavy prykładaje artykuł TUT.BY, skrynšot pasta Alaksandry, jaki jana napisała na fejsbuku, ček pajezdki i dysk pasadki i vysadki pasažyraŭ.
Fota z fejsbuka
— Vy ličycie, što infarmacyja, jakuju vy raspaŭsiudzili, źjaŭlajecca zahadzia łžyvaj? — udakładniŭ pry apytańni milicyjanier u Alaksandry.
— Nie.
— Jana hanić inšuju asobu?
— Nie.
Akazałasia, u milicyju Alaksandr Stachoŭski źviarnuŭsia na nastupny dzień paśla toj samaj pajezdki — 12 sakavika.
— Biez kamientaroŭ. Navošta mnie niešta kazać abo asprečvać? — kaža taksist Alaksandr Stachoŭski.
— Prosta raniej vy kazali, što heta była pijar-kampanija i vy hatovyja viarnuć hrošy za hetuju pajezdku. A ciapier napisali zajavu ŭ milicyju…
— Ja šmat na kaho pisaŭ zajavu, mahčyma, pisaŭ, mahčyma, nie. Ja ŭsich nie pamiataju.
— Vy kožny dzień pišacie zajavu na svaich klijentaŭ u RUUS?
— Nie kožny, raz ci dva razy na miesiac. Byvaje, raz na dekadu, byvaje, bujnyja traplajucca pasažyry. Kudy ja źviartajusia — heta majo hramadzianskaje prava.
— Dyk hrošy budziecie viartać?
— Viadoma. Kali da mianie źvierniecca madam, ja ž nie paviazu joj dachaty hetyja hrošy.
Jak stała viadoma TUT.BY, milicyja spyniła spravu, nichto Alaksandru za post u sacsietcy karać nie budzie.
«Ja viarnu toj klijentcy hrošy. A paśla padam na jaje ŭ sud», — pryncypy pracy taksista, jaki ŭziaŭ $30 za 15 km
