Žycharka Viciebska davieryłasia «lekarcy» — i straciła bujnuju sumu hrošaj i załatyja ŭpryhožvańni.
Pa dadzienych śledstva, 33-hadovaja žycharka Viciebska ŭ kastryčniku 2014 hoda ŭ lifcie žyłoha doma pračytała abjavu ab źniaćci psoty i lačeńni ad chvarob. U vyniku niekalkich sustreč z aŭtaram abjavy, žančyna spyniła znosiny z «lekarkaj». Ale nieŭzabavie žančynie patelefanavała dačka «znacharki» - 37-hadovaja Rada - z prapanovaj dapamahčy ŭ lačeńni ad epilepsii. U vyniku nastupnych sustreč Rada zapeŭniła ab najaŭnaści ŭ siabie takich zdolnaściaŭ i pravodziła roznyja darahija abrady pa źniaćci psuty, dla jakich nieabchodny byli hrašovyja srodki.
«Lekarka» Rada. Fota — Śledčy kamitet
Žančyna taksama ŭdzielničała ŭ abradach «spalvańnia» hrašovych srodkaŭ, jakija na sumu 2 200 rubloŭ i za 1 500 dalaraŭ ZŠA pieradała padazravanaj.
Akramia taho, padazravanaja zavałodała 14 załatymi vyrabami paciarpiełaj, jakija nibyta treba było pačyścić. Paśla taho, jak paciarpiełaja prajšła lačeńnie ŭ balnicy i paprasiła viarnuć jaje ŭpryhožvańni, Rada paviedamiła, što jana praviała ź imi abrad i vykinuła zavušnicy, łancužki, kułony i kolcy ŭ raku.
Ahułam, ź listapada 2014 hoda pa maj 2015 hoda padazravanaja šlacham padmanu zavałodała hrašymi paciarpiełaj — 1 000 jeŭra, 3 750 dalaraŭ ZŠA, bolš za 12 000 rubloŭ, paviedamlajuć śledčyja.
U lipieni 2016 hoda «lekarku Radu» znajści nie zmahli i abvieścili ŭ vyšuk. U krasaviku 2017 hoda žančynu zatrymali ŭ Minsku. Ciapier jana znachodzicca pad vartaj.
«Lekarcy» pradjaŭlena abvinavačvańnie ŭ machlarstvie, ździejśnienym ŭ asabliva bujnym pamiery. Maksimalnaje pakarańnie pa hetym artykule — 10 hadoŭ pazbaŭleńnia voli.
U materyjałach kryminalnaj spravy majucca źviestki ab troch padobnych faktach machlarstva ŭ 2015 hodzie, ździejśnienych padazravanaj Radaj Uładzimiraŭnaj Mietnkoŭskaj u dačynieńni da žycharoŭ Viciebska. Hetyja fakty praviarajuć śledčyja.
Śledčy kamitet źviartajecca da hramadzian, jakim što-niebudź viadoma ab supraćpraŭnaj dziejnaści Mietnikoŭskaj Rady Uładzimiraŭny, abo jakija stali paciarpiełymi ad jaje ašukanskich dziejańniaŭ. Śledčyja zaklikajuć źviarnucca ŭ Viciebski haradski adździeł Śledčaha kamiteta pa adrasie: horad Viciebsk, praśpiekt Maskoŭski, 51A abo patelefanavać pa telefonie 8 ( 0212) 46-21-61.
