Kiraŭnica kampanii «Naš dom» Volha Karač zajaviła, što niekalki dzion tamu ŭ Viciebsku źnikła skandalnaja błohierka, maci dvaich niepaŭnaletnich dziaciej, Volha Žuraŭskaja.
«Jana była našym vałancioram, rabiła videa, u tym liku i nam taksama, — raskazała «Našaj Nivie» Karač. — Apošni raz my ź joj havaryli 7 maja, a 19:55. Jana była ŭstryvožanaja, kazała, što jość pahrozy z boku milicyi, što adčuvaje za saboju sačeńnie. Ab 11-j viečara ja musiła prylacieć u Biełaruś, skazała, što pahavorym pa prylocie. Jana pahadziłasia, skazała, što akurat dziaciej pakładzie spać — u jaje dačka siami hadoŭ i synu mo čatyry. Moj rejs zatrymaŭsia, ja prylacieła apoŭnačy i padumała, što jana ŭžo śpić — telefon nie adkazvaŭ. Ale ŭ toj ža viečar ź jaje staronki ŭ fejsbuku pačalisia niejkija dziŭnyja dopisy pra terakty, niejkija karcinki z čarapami i słovami, što ŭsio tolki pačynajecca… Pry hetym na paviedamleńni i zvanki nie było nijakaj reakcyi, u voknach kvatery ciomna. Užo 10 maja, a čałaviek dahetul nie vychodzić na suviaź, muža ŭ jaje niama. Dzie dzieci? U milicyi nam skazali, što takoha čałavieka ŭ śpisach zatrymanych za apošnija dni niama. My vielmi chvalujemsia i praciahvajem pošuki».
Volha Žuraŭskaja.
Chto takaja taja Volha Žuraŭskaja? I čym hipatetyčna mahła vyklikać niepryjaznaść z boku milicyi?
Dla svajho błoha «Zdymać dazvolena» Volha rabiła sacyjalnyja videa — naprykład, šukała niajakasnyja pradukty ŭ charčovych kramach, rabiła «test-drajv» haścinic u rajcentrach.
Časam jana dziejničała razam z aktyvistami ruchu «Chrušy suprać» — heta takaja rasijskaja inicyjatyva, jakuju razam sa «Stopchamam» kuryravali z Administracyi prezidenta Rasii.
Usie kanfliktnyja situacyi z supracoŭnikami ŭstanoŭ, pra jakija viałasia havorka, traplali na videa biez retušavańnia.
Znajomyja błohierki kažuć, što niekatoryja jaje zamaloŭki sapraŭdy ŭpłyvali na situacyju.
Supracoŭniki milicyi taksama «śviacilisia» na kanale Žuraŭskaj davoli časta, pryčym u roznych kantekstach, časam davoli pravakacyjnych.
Voś, naprykład, kaleha Žuraŭskaj i adnačasova aktyvist «Chrušy suprać» «trolić» daišnika — videa nazyvajecca «Supracoŭnik milicyi admoviŭ u dapamozie hramadzianinu».
Ci jašče adzin prykład nieadnaznačnych dziejańniaŭ: voś Volha niekalki chvilin zdymaje patrulnych sa śpiny, dajučy advolnyja kamientary ich dziejańniam, kštałtu «kali treba — nie dazvonišsia», «praciraj telefon, praciraj, tolki dzirki nie pratry».
U inšych videa pra milicyju časta adlustravanyja situacyi i dyjałohi, kali Žuraŭskaja admaŭlaje pakazać supracoŭnikam dakumienty — jany tak i nazyvajucca: «Jak zakonna abłamić miantoŭ z pravierkaj dakumientaŭ», naprykład.
Ci moh taki ekscentryčny padychod da hramadzianskaj aktyŭnaści vyklikać šał słužboŭcaŭ i stać pryčynaj dziŭnaha źniknieńnia? Takija vypadki, kali ludzi «hublalisia», a paśla «znachodzilisia» ŭ sudach ci SIZA, u krainie ŭžo byvali, pryčym nieadnarazova.
Znajści Volhu na miescy raboty nie ŭjaŭlajecca mahčymym — jana nidzie nie pracuje. Jaje siabroŭka Karač miarkuje, što taja žyła na hrošy ad alimientaŭ.
Aktyvisty «Našaha doma» praciahvajuć pošuki.
