Deputat Dziarždumy ad KPRF Mikałaj Charytonaŭ prapanavaŭ razarvać dypłamatyčnyja suviazi z Polščaj i adklikać z krainy rasijskaha pasła z-za pryniaćcia Varšavaj zakona ab znosie savieckich pomnikaŭ, paviedamlaje ria.ru.
«My pavinny da kanca dnia pryniać zvarot u dačynieńni da taho zakona, jaki pryniaŭ polski Siejm. U našym zvarocie pavinna być praduhledžana siońnia ž da viečara razarvać dypłamatyčnyja suviazi, adklikać svajho pasła, polskaha prahnać, usiaki handal u Polščy zakryć», — zajaviŭ Charytonaŭ na pasiadžeńni Dziarždumy.
Jon padkreśliŭ, što ŭ Polščy zahinuła 600 tysiač sałdat Čyrvonaj armii.
Raniej namieśnik staršyni frakcyi «Spraviadlivaja Rasija» Aleh Niłaŭ prapanavaŭ Polščy ekshumavać astanki savieckich sałdat, pachavanych u čas Vialikaj Ajčynnaj vajny, i viarnuć ich nazad u Rasiju.
Nahadajem, u červieni polski parłamient pryniaŭ zakon, jaki praduhledžvaje znos kala 500 pomnikaŭ, jakija prasłaŭlajuć kamunizm. Pavodle padlikaŭ Instytuta nacyjanalnaj pamiaci Polščy, jaki adkazvaje za memaryjalnuju pracu, zakon ab dekamunizacyi zakranie kala 230 pomnikaŭ Čyrvonaj armii.
Rasijski MZS zajaviŭ, što ŭ Polščy nie chočuć pakidać miemaryjały, jakija ŭšanoŭvajuć pamiać ab niepažadanych ciapierašnim uładam krainy arhanizacyjach, padziejach i datach. U viedamstvie padkreślili, što aŭtary «vajny» z pomnikami pravakujuć dalejšaje abvastreńnie ŭ rasijska-polskich adnosinach.
U Dziarždumie krok polskich uładaŭ nazvali ździekam z pamiaci savieckich ludziej, jakija abaraniali hetuju krainu ad fašystaŭ, a Hramadskaja pałata źviarnułasia ŭ AAN z patrabavańniem dać publičnuju acenku polskamu zakonu.
