Prezident ZŠA Donald Tramp iznoŭ paabiacaŭ pabudavać ścianu na miažy ź Mieksikaj, pryhraziŭšy nie padpisać biudžet, kali ŭ im nie buduć vyłučanyja hrošy na hety prajekt. Adsutnaść biudžetu pryviadzie da taho, što fiederalnyja ŭstanovy ZŠA prypyniać svaju dziejnaść, piša VVS.
Na mitynhu svaich prychilnikaŭ pad łozunham «Zrobim Amieryku znoŭ vialikaj» ŭ Finiksie, štat Aryzona, Tramp abvinavaciŭ apazicyjanieraŭ z šerahaŭ Demakratyčnaj partyi ŭ abstrukcyjaniźmie, a taksama abrynuŭsia z krytykaj na srodki masavaj infarmacyi.
Tramp taksama zakranuŭ pytańni imihracyi i svaich supiernikaŭ-demakrataŭ, jakija, jak jon zajaviŭ, «staviać pad pahrozu biaśpieku Amieryki», pieraškadžajučy budaŭnictvu ściany na miažy ź Mieksikaj.
Jon spasłaŭsia na słovy pradstaŭnikoŭ mihracyjnych słužbaŭ, jakija pracujuć u hetym rehijonie i ličać žyćciova važnym pastavić barjer na šlachu nielehalnych imihrantaŭ, i niečakana padsumavaŭ: «Navat kali nam daviadziecca zakryć ŭradavyja ŭstanovy — my pabudujem ścianu!»
U vypadku adsutnaści biudžetu fiederalny ŭrad ZŠA prypyniaje svaju dziejnaść, za vyklučeńniem niekatorych žyćciova važnych funkcyj.
