28-hadovy menedžar niekamercyjnych prajektaŭ Uładź Staškievič 10 vieraśnia prabieh Mienski paŭmaraton z nacyjanalnym ściaham.
Jon raskazaŭ Radyjo Svaboda, što ściah byŭ na im zaviazany ad samaha pačatku. U chutkim časie jon razharnuŭ ściah i ŭžo da samaha finišu bieh, trymajučy jaho ŭ rukach.
«Paŭmaraton heta nia tolki pra sport, ale i fajnaja mahčymaść prasoŭvać niejkija idei. Tam i kamercyjnyja arhanizacyi, i JUNISEF, i AAN majuć svaich pradstaŭnikoŭ, jakija biahuć ź ich symbolikaj, ź ich ściahami. I ja padumaŭ, što heta vydatnaja mahčymaść prasoŭvać naš nacyjanalny bieł-čyrvona-bieły ściah».
Uładź Staškievič kaža, što astatnija ŭdzielniki i hledačy vielmi dobra reahavali na ściah.
«Kožnyja 2-3 chviliny mnie kryčali «Žyvie Biełaruś!», a ja adkazvaŭ «Žyvie viečna!» Ludzi mianie dahaniali, niechta bieh pobač, znajomilisia, chvalili, škadavali, što sami nie dadumalisia ŭziać ściah. Ja adkazvaŭ, što ŭ nastupnym hodzie budzie takaja mahčymaść. Niekatoryja navat sełfi sa mnoj rabili».
Pavodle Staškieviča, razmovy padčas biehu, mahčyma, krychu pieraškodzili tempu — jon adoleŭ dystancyju pryblizna za 2 hadziny 4 chviliny, choć padčas trenirovak zvyčajna prabiahaŭ jaje na 10 chvilin chutčej. Staškievič kaža, što ŭpieršyniu ŭdzielničaŭ ŭ Mienskim paŭmaratonie letaś — tady jon prabieh najmienšuju mahčymuju dystancyju dla ŭdzielnika, piać z pałovaj kilametraŭ. A sioleta, paśla trenirovak, jon adoleŭ dystancyju całkam.
Raniej za publičnuju demanstracyju nacyjanalnaj symboliki ludziej časam zatrymlivali. «Ja ŭ pryncypie byŭ hatovy atrymać štraf. Dziela takoj padziei možna było i ryzyknuć,» — kaža Ŭładź Staškievič.
