Raspracavany prajekt dekreta ab zabiaśpiečvalnym depazicie maje raźniavolić biznes-inicyjatyvu. Biznesoŭcy zmohuć ryzykavać, nie bajučysia trapić za kraty ŭ vypadku pamyłki.
Zhodna z prajektam dekreta, luby biznesmien zmoža pakłaści na śpiecyjalny rachunak u «Biełarusbanku» nie mienš za 50 tysiač rubloŭ. Heta budzie harantyjny depazit dla zabieśpiačeńnia kampiensacyi pryčynienaj škody. Pryčym taki depazit možna budzie zavieści i dla siabie, i dla luboj inšaj asoby.
Kali ŭ budučyni ŭ dačynieńni da biznesmiena budzie zaviedzienaja kryminalnaja sprava pa «ekanamičnym artykule», jaje razhlad projdzie pa sproščanaj pracedury, biez pazbaŭleńnia svabody.
Havorka idzie pra pryčynieńnie majomasnaj škody biez prykmietaŭ kradziažu (art. 216 KK), kantrabandu (art. 228 KK), niezakonnaje pieramiaščeńnie tavaraŭ praź miažu (art. 228.1 KK), uchileńnie ad vypłaty mytnych płaciažoŭ (art. 231 KK), niezakonnuju pradprymalnickuju dziejnaść (art. 233 KK), lehalizacyju srodkaŭ, atrymanych złačynnym šlacham (art. 234 KK), nabyćcio abo zbyt materyjalnych kaštoŭnaściaŭ, zaviedama zdabytych złačynnym šlacham (art. 237 KK), utojvańnie bankructva ( art. 239 KK), uchileńnie ad vypłaty padatkaŭ (art. 243 KK), pieravyšeńnie ŭłady abo słužbovych paŭnamoctvaŭ (č. 1 art. 426 KK), słužbovuju chałatnaść (art. 428 KK), a taksama administracyjnyja pravaparušeńni, praduhledžanyja raździełami 11-14 KaAP.
Pry najaŭnaści padstaŭ dla zaviadzieńnia kryminalnaj spravy pravaachoŭniki vyśviatlać, ci jość u parušalnika harantyjny depazit. Kali jon jość i sumy chapaje dla pakryćcia škody, to kryminalnaja sprava nie zavodzicca. U takim razie pravaachoŭniki prymajuć pastanovu i zabirajuć častku hrošaj z rachunka ŭ dachod dziaržavy.
Adnačasova pastanova nakiroŭvajecca vinavatamu biznesmienu, jaki na praciahu 20 dzion pavinien vypłacić u biudžet kampiensacyju ŭ pamiery 30% sumy škody. U advarotnym vypadku hetuju sumu spahoniać prymusova sudovyja vykanaŭcy.
Kali ž hrošaj na rachunku nie dastatkova dla kampiensavańnia škody, to kryminalnuju spravu ŭsio ž zaviaduć. Ale na čas raźbiralnictva biznesmiena ŭ izalatar ŭsio ž nie adpraviać.
