Dakumentalnuju stužku Siarhieja Budkina i Jaŭhiena Šapčyca «Nienaŭmysny šedeŭr» možna ŭbačyć upieršyniu na vialikim ekranie na 24-m mižnarodnym kinafestyvali «Listapad» 6 listapada, paviedamlaje partał tuzinfm.by. U miežach adzinaha pakazu ŭ kinateatry «Mir» adbudziecca taksama sustreča sa stvaralnikami «Narodnaha albomu».
Film «Narodny albom. Nienaŭmysny šedeŭr» byŭ prezentavany ŭ noč z 31 śniežnia na 1 studzienia 2017 hodu na telekanale «Biełsat». Aŭtary Siarhiej Budkin i Jaŭhien Šapčyc uzialisia raspavieści pra historyju samaha značnaha muzyčnaha prajektu ŭ najnoŭšaj biełaruskaj historyi, jaki byŭ zrobleny siabrami na čystym entuzijaźmie. «Usie, chto mieŭ dačynieńnie da «Narodnaha albomu», pastaleli. Los raskidaŭ ich pa roznych tusoŭkach i navat roznych krainach. Dy i siabroŭstva taho ŭžo bolš niama. Šmat chto z ich sumniajecca: a ci varta reanimavać toje, što było aktualna prykancy 90-ch? Niekatoryja ž miarkujuć, što hety prajekt — pa-za časam, i ciapier, nazapasiŭšy dosviedu, jany zdolnyja nadać jamu druhoje dychannie. Chto z ich maje racyju? Ci zmohuć usie sabracca razam? A kali zmohuć, ci zdoleje novaja pastanoŭka paŭtaryć pospiech papiaredniaj? Kab adkazać na hetyja pytańni my viartajemsia ŭ toj čas, kali zadumvaŭsia prajekt, i prachodzim z udzielnikami 20-hadovy šlach ažno da padrychtoŭki rymejku na scenie Padlaskaj opery ŭ vieraśni 2016-ha», — kažuć stvaralniki filmu.
Film uklučany ŭ pazakonkursnych prahramu dakumentalnaha kino. Na vialikim ekranie jon budzie pakazany ŭpieršyniu 6 listapada ŭ mienskim kinateatry «Mir» u 21.00.
Nabyć kvitok
Stužka doŭžycca kala 50 chvilinaŭ. Paśla jaje pakazu zaplanavanaja sustreča z udzielnikami «Narodnaha albomu» dy mini-kancert Kasi Kamockaj i Alaksandra Pamidorava. Kvitok koštam 3,5 rub. možna nabyć u kasach kinateatru pierad pakazam albo zahadzia onłajn. Telefon kasy — 8 (017) 284-37-71.
