Fota: GETTY IMAGES
Ułady štata Techas aficyjna paćvierdzili, što ŭ baptysckaj carkvie miastečka Sazierlend-Sprynhs (Sutherland Springs) u niadzielu ŭčyniŭ stralaninu 26-hadovy Devin Patryk Keli.
U vyniku zahinuli jak minimum 26 čałaviek, bolš za 20 byli paranienyja. Sazerlend-Sprynhs — maleńki haradok, dzie žyvuć tolki niekalki sotniaŭ čałaviek, za 50 km na paŭdniovy ŭschod ad San-Antonia.
Pavodle palicyi, padziejam u carkvie papiaredničaŭ kanflikt u siamji napadnika, piša Bi-bi-si.
Strałka ŭdałosia abiasškodzić dziakujučy chutkaj reakcyi miascovych žycharoŭ, jakija stali vidavočcami napadu. Adzin ź ich adkryŭ sustrečny ahoń pa strałku, paraniŭ jaho i vymusiŭ kinucca naŭcioki. Palicyjanty ličać, što paśla hetaha złačyniec skončyŭ žyćcio samahubstvam. Pierad śmierciu Keli patelefanavaŭ svajmu baćku, kab raźvitacca.
26-hadovy Keli žyŭ u miastečku Ńju-Braŭnfiełs, štat Techas.
U 2010—2014 hadach Keli słužyŭ u vajskova-pavietranych siłach u samym nizkim zvańni — niekvalifikavanaha radavoha avijacyi.
U 2012-m jon byŭ addadzieny pad trybunał za źbićcio žonki i dziciaci i prysudžany da 12 miesiacaŭ turmy.
U 2014-m Keli byŭ razžałavany i zvolnieny z vojska.
Nie majučy na toje prava, jon nabyŭ zbroju ŭ 2016 hodzie, pry hetym jon paviedamiŭ niesapraŭdny adras i schłusiŭ pry adkazie na pytańnie pra najaŭnaść sudzimaści.
Pavodle miascovych haziet, Keli byŭ ateistam, varoža nastrojenym suprać viernikaŭ i carkvy.
«Jon pastajanna kazaŭ pra toje, što ludzi, jakija vierać u Boha, — tupyja, i sprabavaŭ pierakonvać ludziej u pravilnaści ateizmu», — pryvodziać miascovyja vydańni słovy jaho byłoj adnakłaśnicy.
Pa słovach šeryfa akruhi, svajaki Keli i jaho byłaja žonka čas ad času naviedvali hetuju carkvu, ale ŭ dzień napadu ich tam nie było. A pryčynaj napadu staŭ siamiejny kanflikt, a nie relihijnyja pierakanańni abo rasavaja nianaviść.
Apošnim časam u jaho byli napružanyja adnosin sa svajakami, u pieršuju čarhu ź cieščaj. U apošnija dni jon adpraŭlaŭ joj sms-paviedamleńni z pahrozami.
Što viadoma pra achviar?
Jak paviedamlaje palicyja, siarod zahinułych — ludzi va ŭzroście ad 5 da 72 hadoŭ.
23 čałavieki byli znojdzienyja miortvymi ŭnutry carkvy, u toj čas jak dva čałavieki byli zabityja zvonku. Jašče adzin paciarpieły pamior u balnicy.
Šeryf akruhi Uiłsan Džo Takit skazaŭ Bi-bi-si, što piać ci šeść achviar byli z adnoj siamji, a amierykanskija ŚMI miarkujuć, što ich moža być vosiem.
Pastar carkvy, dzie adbyłasia stralanina, Frenk Pomraj paviedamiŭ, što ŭ vyniku napadu zahinuła jaho 14-hadovaja dačka Anabel. Samoha pastara z žonkaj u hety čas nie było ŭ horadzie.
Jak adbyvaŭsia napad?
Keli, apranuty va ŭsio čornaje — u broniekamizelcy i sa šturmavoj vintoŭkaj, a 11:30 pa miascovym časie uvajšoŭ u budynak carkvy ŭ miastečku Sazerlend-Sprynhs i pačaŭ stralać pa prysutnych.
U hety čas u carkvie išła niadzielnaja słužba. Pa słovach miascovych žycharoŭ, zvyčajna na słužbu ŭ hetuju carkvu prychodzić kala 50 viernikaŭ.
Carkva ŭ jakoj adbyłasia stralanina
Jak udałosia abiasškodzić napadnika?
Dva miascovyja žychary, jakija apynulisia pobač ź miescam zdareńnia, pasprabavali spynić strałka, paranili jaho i kinulisia za im u pahoniu.
Udvaich jany hnalisia za napadnikam na chutkaści kala 150 km/hadzinu, pakul toj nie straciŭ kiravańnie aŭtamabilem.
Pa źviestkach amierykanskich ŚMI, pieršym, chto ŭstupiŭ ŭ pierastrełku z napadnikam, čym vyratavaŭ mnostva žyćciaŭ, byŭ Styvien Uiłfard, jaki žyvie niepadalok. 55-hadovy santechnik, jaki nie maje śpiecyjalnaj vajskovaj padrychtoŭki, schapiŭ ŭłasnuju vintoŭku i pabieh na huki stralby paśla taho, jak jaho dačka raspaviała jamu, što adbyvajecca.
Prybiehšy da carkvy, Uiłfard sutyknuŭsia z napadnikam tvar u tvar. Uiłfard zdoleŭ paranić Keli, patrapiŭšy jamu ŭ bok praz zazor u broniekamizelcy, paśla čaho toj byŭ vymušany kinucca naŭcioki.
U hety čas mima prajazdžaŭ Džoni Łanhiendorf. «Uiłfard, uschvalavany, sa zbrojaj u rukach, padbieh da majoj mašyny i ścisła skazaŭ mnie, što adbyłosia. Jon zaskočyŭ u mašynu, i ja zrazumieŭ, što treba dziejničać», — uspaminaje Łanhiendorf.
Staronka samoha Łanhiendorfa ŭ «Fejsbuku» zaraz poŭnaja padziak i słovaŭ padtrymki.
«Chaj tabie Haspodź dapamahaje, Džoni. Ty sapraŭdny amierykanski hieroj», — napisaŭ adzin z karystalnikaŭ sacsietki.
Žychary Sazierlend-Sprynhs ŭ noč na paniadziełak zładzili žałobnuju cyrymoniju sa śviečkami. Fota: GETTY IMAGES.
Jak reahujuć amierykanskija ŭłady?
Hubiernatar štata Hreh Ebat, jaki prysutničaŭ na žałobnaj cyrymonii ŭ noč na paniadziełak, nazvaŭ toje, što adbyłosia, samym kryvavym masavym zabojstvam u historyi Techasa.
Prezident ZŠA, jaki znachodzicca ŭ pajezdcy pa krainach Azii, napisaŭ u svaim «Tvitary»: «Niachaj Boh dapamoža ludziam u Sazerlend-Sprynhs ŭ Techasie. FBR i pravaachoŭnyja orhany pracujuć na miescy zdareńnia. Ja saču za situacyjaj ź Japonii».
Paźniej, na pres-kanfierencyi Tramp praihnaravaŭ pytańnie pra nieabchodnaść bolš žorstkich zakonaŭ u halinie prodažu zbroi.
«U nas u krainie šmat prablem ź psichičnym zdaroŭjem, prablema nie ŭ zbroi», — skazaŭ jon.
«Pa ščaście, u kahości jašče taksama akazałasia zbroja, što dazvoliła adkryć sustrečny ahoń. U advarotnym vypadku ŭsio mahło b skončycca značna, značna horš», — skazaŭ prezident ZŠA.