Interviju Alaksandra Milinkieviča NN.
Vybary zastajucca praformaj, a systema mianiaje tolki fasad, ale nia sutnaść. Tym nia mienš, Vy vystupajecie za ŭdzieł kandydataŭ ad apazycyi ŭ vybarach i raźvićcio dyjalohu ES z administracyjaj Alaksandra Łukašenki. Čamu?
Biełaruś apynułasia ŭ składanaj sytuacyi i nia maje dastatkova ni palityčnaj voli, ni ekanamičnych resursaŭ dla samastojnaha ažyćciaŭleńnia mienš zaležnaj ad Rasii palityki pa raźvićci samastojnaj dziaržavy. Suma renty za vuhlevadarodny tranzyt razam z prybytkami ad ekspartu biełaruskaj pradukcyi ŭ Rasiju składajuć kala pałovy našaha dziaržaŭnaha biudžetu. Nierefarmavanaja i niekankurentazdolnaja haspadarka krainy nie padrychtavanaja da rynkavych cenaŭ na enierhanośbity. Navat niaznačnaje pavyšeńnie cenaŭ na haz prymušaje ŭrad brać ŭ Maskvie kredyty na miljardy dalaraŭ.
Kali Biełaruś terminova nie pačnie madernizacyi ekanomiki i adpaviednaj palityčnaj liberalizacyi, to ŭ bližejšyja hady zapazyčanaść Rasii stanie krytyčnaj.U 2011 hodzie paśla planavanaha zapusku Paŭnočnaeŭrapiejskaha hazapravodu i Bałtyjskaj trubapravodnaj systemy – 2 i pierachodu našaj krainy na suśvietnyja ceny na haz biełaruskaja ekanamičnaja madel prypynić svaje isnavańnie, a dziaržava papadzie ŭ poŭnuju zaležnaść ad Rasii.
Jakija mohuć być kroki da ŭmacavańnia niezaležnaści Biełarusi?
Žorstka pryviazanaja da Rasijskaj Fiederacyi palityčnymi i ekanamičnymi abaviazacielstvami Biełaruś nia ŭ stanie pačać realizoŭvać evalucyjnyja pieraŭtvareńni ni ŭ palityčnaj, ni ŭ ekanamičnaj sistemach krainy biez harantyj zachavańnia suvierenitetu i finansavaj stabilizacyjnaj padtrymki.
Paśla vyzvaleńnia palityčnych viaźniaŭ naturalnym partnioram dla madernizacyi Biełarusi moža i pavinien stać Eŭrasajuz. Adnak
pieraškodaj dla kanstruktyŭnych pieramovaŭ źjaŭlajucca, z adnaho boku, viadomyja ŭmovy ES, ź inšaha boku, tradycyjny niedavier biełaruskich uładaŭ da Zachadu i, jak nastupstva, niežadańnie iści na reformy ŭ krainie biez adpaviednych harantyjaŭ.Kali baki zhodziacca, što 12 umovaŭ Eŭrakamisii mohuć być pierafarmulavany i buduć vykonvacca biełaruskim bokam nie adnačasova, a pastupova, to pazytyŭny dla Biełarusi dyjaloh całkam realny. Tady źjavicca perspektyva palapšeńnia adnosinaŭ Eŭrasajuzu i Biełarusi i ŭ vyniku - surjoznyja šancy na ŭzmacnieńnie našaj niezaležnaści.
Jakoj maje być antykryzisnaja palityka Eŭrasajuzu ŭ adnosinach z uradam našaj krainy?
Kab vyvieści Biełaruś sa status-kvo i paźbiehnuć jaje padzieńnia ŭ niabyt, Zachadu nieabchodna aktyŭnaja palityka - maralnaja i hnutkaja - i dakładna ŭzhodnienaja paśladoŭnaść dziejańniaŭ. U miežach dyjalohu z kiraŭnictvam krainy treba sfarmulavać prahramu palityčnych i ekanamičnych krokaŭ nasustrač adno adnamu. Hetaja
«darožnaja karta» pavinna ŭtrymlivać uzajemnyja dziejańni i ŭzajemnyja abaviazacielstvy pamiž Biełaruśsiu i Eŭraźviazam.
Siarod asnoŭnych patrabavańniaŭ ES da biełaruskaj ułady mohuć być: harantyi hazavaha, naftavaha i elektraenerhietyčnaha tranzytu; vykanańnie mižnarodnych rašeńniaŭ adnosna dziaržavaŭ, jakija sadziejničajuć teraryzmu; spynieńnie pieraśledu apazycyi i hramadzianskaj supolnaści; zakanadaŭčaje i praktyčnaje zabieśpiačeńnie svabodnaha funkcyjanavańnia ŚMI; arhanizacyja cyvilizavanych vybaraŭ. Adnačasova krokami Eŭraźviazu mahli by stać: źniaćcio «palityčnaha embarha» z łukašenkaŭcaŭ; finansavańnie dziaržaŭnych prahram Eŭrapiejskim bankam rekanstrukcyi i raźvićcia; uviadzieńnie dla Biełarusi elementaŭ režymu najbolšaha spryjańnia ŭ handli z krainami ES; dałučeńnie da prahramaŭ dobrasusiedztva ES.
Dzie harantyi, što hetaja stratehija maje perspektyvy?
Pry paśpiachovaj realizacyi pieršaj «darožnaj karty» baki mohuć raspačać raspracoŭku nastupnaj.
Pry nievykanańni ŭziatych na siabie abaviazacielstvaŭ adnym z bakoŭ zaplanavanyja kroki druhoha boku prypyniajucca.Alternatyvaj stratehii dyjalohu z ES jość dalejšaja samaizalacyja Biełarusi, kančatkovaja likvidacyja ekanamičnaj, a paźniej i palityčnaj niezaležnaści našaj krainy.
