U supołcy Ukantakcie «Faŭna Homiela» apublikavali fatahrafii z busłam, jaki nie palacieŭ zimavać, a zastaŭsia pad Homielem, paviedamlajuć «Mocnyja naviny».
Zdymak u pablik dasłaŭ homielski fatohraf i błohier Alaksiej Hołubieŭ. 4-ha lutaha ŭ jaho abjektyŭ trapiŭ bieły busieł, jaki łunaje ŭ niebie. Zvyčajna hetyja ptuški pakidajuć Biełaruś jašče ŭ žniŭni, choć niekatoryja hrupy źbirajucca na adlot ŭ Paŭdniovuju Afryku ŭ vieraśni. Zastajucca zimavać, jak paviedamlaje «Faŭna», tolki asłablenyja i chvoryja ptuški. U busła całkam jość šancy vyžyć, kali jon zmoža apynucca la adkrytaj vady — heta krynica ježy i, što niemałavažna, ciapła.
Padobna na toje, što hetamu busłu ŭsio ž taki pašancavała. U navakolli praciakaje rečka Uza, jakaja zamiarzaje redka, a jašče jość ačyščalnyja zbudavańni.
