Śledčy kamitet zatrymaŭ 22-hadovaha ŭradženca Mazyra Uładzisłava Šavialenku. Mužčyna stvaryŭ kłasičnuju finansavuju piramidu, abiacajučy ŭkładčykam dobry prybytak. Ale skončyłasia ŭsio jak zvyčajna — rasčaravańniem dla «inviestaraŭ» i kryminalnaj spravaj dla «biznesmiena».
Uładzisłaŭ Šavialenka
Šavialenka stvaryŭ prajekt «New Assets Union». Prapracavaŭ jon trochi bolš za hod.
Faktyčna heta była zvyčajnaja finansavaja piramida, nakštałt sumna viadomaha «MMM». Nijakaj dziejnaściu kampanija nie zajmałasia, a kali hrošy i spłačvali, to heta rabiłasia za košt novych udzielnikaŭ.
«Kab stvaryć bačnaść aktyŭnaści finansavaj arhanizacyi, małady čałaviek rehularna vykonvaŭ dziejańni, nakiravanyja na pryciahnieńnie najbolšaj kolkaści ŭkładčykaŭ. Tak, jon stvaryŭ u internecie sajty prajekta «New Assets Union», dzie rekłamavaŭ atrymańnie dachodu ad inviestavańnia, i raźmiaščaŭ infarmacyju pra nibyta vyrablenych vypłatach adsotkaŭ układčykam, chavajučy tym samym złačynnuju skiravanaść jaho dziejnaści. Taksama abvinavačany raspracavaŭ i vykarystoŭvaŭ sistemu ŭznaharodžańnia ŭdzielnikaŭ prajekta za pryciahnieńnie novych ŭkładčykaŭ. Da prykładu, u adnym z rolikaŭ kampanii paviedamlałasia, što za 100 pryciahnutych ludziej vydajecca iPhone, za 500 — MacBook, a za tysiaču novych klijentaŭ udzielnik atrymlivaje 10.000 dalaraŭ ZŠA», — paviedamlaje Śledčy kamitet.
Akramia taho stvaralnik prajektu pieryjadyčna raskazvaŭ jak dobra iduć spravy: maŭlaŭ, kampanija zarablaje na prodažy tavaraŭ z Kitaja, na zdačy nieruchomaści ŭ arendu, na ŭdziele ŭ bukmiekierskich biržach… Sistematyčna pravodzilisia i sieminary, na jakich raskazvałasia pra prajekty. Vyhladała ŭsio pryhoža, zdymalisia ofisy ci kanfierenc-zali ŭ hatelach…
Ale hrošy pieraličvalisia ci na rachunki kampanii, zarehistravanaj u Vialikabrytanii, ci na rachunki ŭ Biełarusi i Łatvii.
Pacichu vypłaty «inviestaram» spynilisia. Ludzi pačali chvalavacca, ale ŭ supołkach «prajektu» Šavialenki ich supakojvali:
«Na vašu dumku, navošta ja ŭsio heta rablu i dziela kaho? Dziela vas ofis, dziela vas dobraja technika i mebla, uklučycie prosta łohiku navošta ŭsio heta? A ja vam adkažu heta dla taho, kab nie stajać na miescy i raźvivacca i raźvivać kampaniju! U płanach adkryvać ofisy nie tolki pa ŭsioj terytoryi RB, ale i RF, a dalej Ukraina! U nas pramaja daroha!»
Ale pramaja daroha pryviała Uładzisłava za kraty.
Paciarpiełymi pa spravie pryznanyja bolš za 900 čałaviek, apytanyja sotni śviedak. Ahulnaja suma zdabytych niezakonnym šlacham hrašovych srodkaŭ składaje bolš za 760 tysiač rubloŭ.
Ciapier Šavialenka pad vartaj. Na jaho zaviali kryminalnuju spravu za machlarstva ŭ asabliva bujnym pamiery. Maksimalnaje pakarańnie pa hetym artykule — 10 hadoŭ źniavoleńnia z kanfiskacyjaj.
