4 lipienia sud Centralnaha rajona Homiela vynies pryhavor 11-ci padletkam, jakija znajomilisia z mužčynami ŭ sacsietkach, sustrakalisia ź imi — i ablivali zialonkaj.
Abvinavačanyja pryznanyja vinavatymi ŭ złosnym i asabliva złosnym chulihanstvie, kradziažach i inšych złačynstvach.
Pa viersii śledstva, maładyja ludzi z dapamohaj pierapiski ŭ sacsietkach prapanoŭvali peŭnym žycharam Homiela (havorka idzie pra mužčyn nietradycyjnaj seksualnaj aryjentacyi) sustrecca na prypynkach hramadskaha transpartu abo pobač z rynkam. Zatym jany akružali patencyjnuju achviaru, pad pahrozaj prymianieńnia hvałtu advodzili ŭ miesca, dzie nichto starońni nie moh by pieraškodzić. Tam abvinavačanyja «vykazvali ŭ adras paciarpiełych dyskredytujučyja ich źviestki, jakija tyja žadali b zachavać u tajamnicy, z pahrozaj prymianieńnia hvałtu». Adnamu paciarpiełamu paśla abrazaŭ i naniasieńnia pabojaŭ častkova pahalili hałavu i ablili jaje zialonkaj, inšamu - nalili zialonku na ruki i prymusili nanieści na tvar.
Taksama niekatorych ź ich abvinavačvali ŭ kradziažach, rabavańniach, vymahalnictvie, raspaŭsiudzie parnahrafičnych materyjałaŭ i malunkaŭ z vykarystańniem internetu.
Sudovyja pasiedžańni prachodzili ŭ zakrytym režymie. Bolšaść ź ich atrymali pa hodu pazbaŭleńnia voli z adterminoŭkaj pakarańnia na hod.
Čaćviarym abvinavačanym pryznačana pakarańnie ŭ vyhladzie pazbaŭleńnia voli na termin 1 hod i 6 miesiacaŭ z adterminoŭkaj na hod.
Adnamu - pazbaŭleńnie voli na termin 2 hady z adterminoŭkaj na hod.
Akramia hetaha piaciarym abvinavačanym byŭ pryznačany štrafy ad 1 225 da 1 470 rubloŭ.
Taksama na karyść adnaho z paciarpiełych abvinavačanyja pavinny vypłacić u salidarnym paradku materyjalnuju kampiensacyju maralnaj škody ŭ pamiery 800 rubloŭ.
