1-2 vieraśnia ŭ biełaruskim centry ŭ Ńju-Jorku adbyłasia 33-ja Sustreča biełarusaŭ Paŭnočnaj Ameryki, jakaja była zarhanizavana Biełaruska-Amerykanskim Zadzinočańniem (BAZA). Sustreča sabrała biełarusaŭ z roznych kutkoŭ ZŠA, jak to Ńju Jork, Ńju Džersi, Fiładelfija, Majami, Bostan; taksama byli hości z Taronta, Kanada.
Hetaja Sustreča była prymierkavana stahodździu BNR, i prajšła pad temaj «Rada BNR i biełaruskaja emihracyja ŭ Paŭnočnaj Amerycy — historyja, sučasnaść i pierśpiektyvy». Hanarovymi haściami sustrečy byli Ivonka Surviła, staršynia Rady BNR, i inšyja siabry Rady BNR, jakija raspaviadali pra dziejnaść Rady.
Siarod hanarovych haściej byli i hości ź Biełarusi: Hleb Łabadzienka, žurnalist, televiadoŭca, hramadski dziejač; i Natalla Hardzijenka, historyk, kandydat histaryčnych navuk, daśledčyk biełaruskaj emihracyi.
U pieršy dzień, na adkryćci Sustrečy, hości prasłuchali pryvitańni ad kiraŭnikoŭ arhanizacyj-udzielnikaŭ Sustrečy. Z pryvitalnym słovam vystupiła staršynia Hałoŭnaj upravy BAZA Natalla Fiedarenka. Staršynia Zhurtavańnia Biełarusaŭ Kanady (ZBK) Alena Lavončanka nie zmahła prysutničać asabista, ale dasłała videa-pryvitańnie ŭdzielnikam Sustrečy.
U pieršy dzień z pramovaj vystupaŭ Hleb Łabadzienka, jaki raspavieŭ pra hramadska-kulturnuju situacyju ŭ Biełarusi, raspavioŭ pra svoj šlach da biełaruščyny, a taksama padzialiŭsia idejami, jak kožny biełarus, navat toj, chto žyvie za miažoj, moža prymać aktyŭny ŭdzieł u hramadskim žyćci Baćkaŭščyny.
Pieršy dzień Sustrečy byŭ zavieršany kancertam ad siamiejnaha hurta Valanciny Parchomienka-Kazak, Alesia Kazaka i Volhi Kazak-Anłar. Valancina razam z mužam Alesiem i dačkoj Volhaj rasčulili ŭsich prysutnych svaim ščyrym vykanańniem biełaruskich hitoŭ, narodnych piesień, i tvoraŭ svajho aŭtarstva.
Druhi dzień Sustrečy pačaŭsia z bahasłužby ŭ sabory Śv. Kiryły Turaŭskaha Biełaruskaj Aŭtakiefalnaj Carkvy ŭ Ńju Jorku i malebnu za Biełaruś. Aficyjnuju častku prahramy druhoha dniu adčynili aktyvisty Bruklinskaha adździełu BAZA, jakija pakazali pastanoŭku «Jak heta było» pra padziei Pieršaha Ŭsiebiełaruskaha Źjezdu 1918 hoda (pa matyvach tvoru Alesia Paškieviča «Plac voli»). U rolach Alesia Haruna i Alesia Busła vystupili braty Siarhiej i Uładzimir Kudzieličy.
Asnoŭnaj častkaj druhoha dniu Sustrečy było plenarnaje pasiedžańnie, na jakim vystupali hanarovyja hości z pramovami i dakładami. Sp-nia Ivonka Surviła raspaviała pra svoj šlach da BNR i razam z BNR, a taksama raspaviała pra dziejnaść Rady ŭ Kanadzie. Sp-nia Natalla Hardzijenka vystupiła z prezientacyjaj pra dziejnaść pradstaŭnikoŭ Rady BNR u ZŠA. Sp. Zianon Paźniak vystupiŭ z refieratam pra rolu BNR u historyi Biełarusi. Paśla vystupaŭ adbyłasia dyskusija pa temie i była pryniataja Rezalucyja Sustrečy.
Akramia abmierkavańnia asnoŭnaj temy sustrečy biełarusy aktyŭna znajomilisia, abmiarkoŭvali pytańni štodzionnaha žyćcia i kultury jak u zamiežžy, tak i na Baćkaŭščynie.
Śviatočnaja prahrama była zavieršanaja kancertam Taćciany Hrynievič-Matafonavaj, jakaja padaryła prysutnym ulubionnyja biełaruskija pieśni i ramansy ŭ svaim vykanańni, a taksama prezientavała novuju kružełku, pryśviečanuju biełaruskim narodnym tancam.
