Niekalki miesiacaŭ tamu Nacbank pryniaŭ rasparadžeńnie, jakoje zabaraniaje bankam ułučać u płatu za kredyt inšyja kamisii, akramia pracentavaj staŭki.
Hałoŭnaja prablema sfery kredytavańnia – zarpłata «ŭ kanvercie». Pryvatnyja biznesoŭcy admaŭlajucca spłačvać vysokija padatki – kala 60% ad zarobku. Bankam heta dobra viadoma (a časam znajoma), tamu raźličvajecca kredyt pry ŭmovach pahašeńnia štomiesiačna sumy pazyki, roŭnaj 50% zarobku (navat kali vy zarablajecie 300 tys. na ŭsiu siamju).
Bankam heta vyhadna, i było b niavyhadna advarotnaje. Naprykład, kali bank daje patrebnyja hrošy na hod, a karystalnik spłačvaje pazyku ciaham troch, bank hublaje svoj prybytak na adsotkach. Pra toje, što hetaja źjava nia nadta ŭžo redkaja, śviedčać uviedzienyja niekatorymi bankami ŭmovy pa terminach pahašeńnia kredytu. Naprykład, Biełhazprambank uvodziŭ štrafnyja sankcyi (6% ad atrymanaj summy), kali kredyt pahašaŭsia na 6 miesiacaŭ raniej.
Hatovych kuplać u kredyt šmatkroć bolej, čym płaciežazdatnych pavodle dakumentaŭ. Z hetaj pryčyny ciažka znajści i paručnika. Pryvatnyja banki bolš čułyja da patrebaŭ rynku, tamu niekatoryja spraščajuć patrabavańni faktyčna da adnoj daviedki, jakuju lohka zrabić. «Ź dziaržaŭnymi bankami pracavać niemahčyma, – aburajecca Ŭładzimier Kandrucki, supracoŭnik aŭtaparku pry ŭvachodzie ŭ kamercyjny bank. – Ja braŭ kredyt u «Biełarusbanku» – heta ž jakaja ciahanina! Naźbirać stos papierak, pryvieści paručnika z adpaviednymi prybytkami. Dzie ty ich siońnia znojdzieš? A tut prynios daviedku pra svoj zarobak za apošnija try miesiacy – i ŭsio».
Praŭda, za taki davier achvotnikam davodzicca płacić vyšejšymi adsotkami i inšymi kamisijnymi. Niahledziačy na toje, supracoŭniki pryvatnych bankaŭ adznačajuć, što popyt na takija pasłuhi ŭpeŭniena idzie ŭharu. «U hałoŭnym upraŭleńni my absłuhoŭvajem prykładna sotniu klijentaŭ za dzień, – paviedamiła «NN» kiraŭnička adździełu raboty ź fizyčnymi asobami adnaho z takich bankaŭ. – Za krasavik naš bank vydaŭ bolš za 6 tys. kredytaŭ».
Jaki b «hałaŭny bol» nie prynosili schavanyja ad padatkaŭ hrošy dla spažyŭcoŭ i biznesoŭcaŭ, dla dziaržavy heta ciažkaja chvaroba, jakoj častkova pazbyvajucca praz tyja samyja kredyty. Rasparadžeńnie Nacbanku palepšyła ŭmovy kredytavańnia, choć šerah bankaŭ zamaskavali svaje «nakručki» pad zavyšanym fiksavanym taryfam za absłuhu. Hrašova-kredytnaja palityka dziaržavy nakiravanaja na vymańnie najaŭnych hrošaj z abaračeńnia. Akramia plastykavych kartak z bankamatami, kredytavańnie – vielmi zručny instrument. Adsačyć, kudy pajšli najaŭnyja hrošy za tavar albo ci byli spłočanyja ź ich padatki, amal niemahčyma, kredytnyja – sprava niekalkich chvilaŭ.
Umovy ŭ hetaj sfery majuć doŭhaterminovuju tendencyju palapšacca, ale ž, kruci ni kruci, za najaŭnyja lubuju reč možna kupić tańniej na 18%.
Taciana Hacura
