Svaje spačuvańni ŭ suviazi sa śmierciu daradčycy mera Chiersona i viadomaj hramadskaj aktyvistki Kaciaryny Handziuk ŭžo vykazaŭ prezident Ukrainy Piatro Parašenka. Jon zapatrabavaŭ ad pravaachoŭnikaŭ zrabić usio mahčymaje dla pakarańnia jaje zabojcaŭ, pieradaje telekanał «112 Ukraina».
Kaciaryna Handziuk pamierła siońnia na 34-m hodzie žyćcia. Papiarednie, pryčynaj śmierci staŭ abryŭ tromba.
Kaciaryna Handziuk. Fota: Facebook
Čym viadomaja Kaciaryna Handziuk
Kaciaryna Handziuk — ukrainski palittechnołah, hramadski dziejač, błohierka i žurnalistka. Z 2010 hoda jana pracavała ŭ hramadskaj arhanizacyi «Centr palityčnych studyj i analityki «Ejdas». Aktyŭnaść arhanizacyi skiravana na daśledavańnie i refarmavańnie śfiery publičnych finansaŭ, baraćbu z karupcyjaj, pavyšeńnie ŭzroŭniu hramadskaj i palityčnaj adukacyi siarod nasielnictva, raźvićcio łakalnaj demakratyi.
«Kaciaryna — čałaviek pramy, zaŭsiody vielmi žorstka i sumlenna vykazvałasia z nahody mnohich situacyj», — tak charaktaryzuje niabožčycu mer Chiersona.
U listapadzie 2016 hoda jana stała zahadčycaj spraŭ vykankama Chiersonskaj haradskoj rady, a taksama vykonvała abaviazki daradčycy mera Uładzimira Mikałajenki.
Siabry Handziuk kažuć, što ŭ jaje byli dva hałoŭnyja «nakirunki», pa jakich jana mieła pryncypovych apanientaŭ: heta supraćdziejańnie «prarasijskim rucham» ŭ Chiersonie, a taksama baraćba z karupcyjaj peŭnych padraździaleńniaŭ miascovaj palicyi.
Zamach na Kaciarynu Handziuk
31 lipienia na čynoŭnicu napali. Kali Handziuk vyjšła kala 8:30 z padjezda ŭłasnaha doma, z kustoŭ joj nasustrač vyjšaŭ chłopiec hadoŭ 20—25 ź jomistaściu vadkaści ŭ rukach. Paraŭniaŭšysia z žančynaj, jon abliŭ joj tvar i ŭciok.
«Vyjšła, mianie ablili. Adčuła niešta ciopłaje. Potym zrazumieła, što adzieńnie pačało płavicca. Dadomu nie mahła pajści. Minaki sprabavali pramyć vadoj», — raspaviała Handziuk advakatu Masi Najemu paśla napadu.
Ekśpiertyza tolki na druhi dzień vyśvietliła, što heta była kancentravanaja siernaja kisłata.
Kaciarynu Handziuk špitalizavali ŭ Chiersonie, a potym dastavili ŭ Kijeŭ.
Fota z adkrytych krynic.
Žančyna atrymała apiok 35% pavierchni skury. Bolš za ŭsio paciarpieli šyja, śpina i častka tvaru kala vačej.
Śledztva padazraje ŭ napadzie na Handziuk piaciarych byłych udzielnikaŭ ATA. Heta — Viačasłaŭ Višnieŭski, Viktar Harbunoŭ, Uładzimir Vasianovič, Siarhiej Torbin i Mikita Hrabčuk. Usie jany byli zatrymanyja. Dvoje ŭziatyja pad vartu, troje — pad chatnim aryštam.
«Śledstva razhladaje dźvie asnoŭnyja viersii napadu: prafiesijnaja dziejnaść Kaciaryny Handziuk na pasadzie vykanaŭcy abaviazkaŭ kiraŭnika aparatu Chiersonskaj haradskoj rady i druhaja viersija — aktyŭnaja hramadzianskaja pazicyja, a taksama jaje hramadskaja i palityčnaja dziejnaść jak aktyvista», — adznačyŭ pieršy namieśnik staršyni Nacyjanalnaj palicyi Ukrainy Viačasłaŭ Abrośkin.
Čaćviora padazravanych u zamachu na Handziuk pryznalisia ŭ złačynstvie. Nie pryznaje viny tolki Torbin.
