Adbyłasia inaŭhuracyja novaha prezidenta Brazilii. Jon abiacaje spynić šmat z taho, što stała normaj dla libieralnych i sacyjalistyčnych kołaŭ.
Žair Bałsanaru staŭ pieršym za doŭhi čas palitykam pravych pierakanańniaŭ na pasadzie prezidenta najbolšaj krainy Łacinskaj Amieryki.
U svajoj inaŭhuracyjnaj pramovie jon abvieściŭ, što hety dzień aznačaje «pačatak vyzvaleńnia Brazilii ad sacyjalizmu, palitkarektnaści i razdźmutaj dziaržavy».
Bałsanaru blizki pa pohladach i manierach da Donalda Trampa. Jak i Tramp, jon skončyŭ Vajskovuju akademiju, ale pajšoŭ nie ŭ biznes, a ŭ armiju, dzie dasłužyŭsia da kapitana. Jon padtrymlivaŭ i dahetul padtrymlivaje režymy antykamunistyčnaj dyktatury, što kiravali Brazilijaj da 1984 hoda.
Jak i Tramp, jon žanaty trecim šlubam. U jaho piaciora dziaciej.
Za jaho masava hałasavali ludzi kansiervatyŭnych pohladaŭ ad chryścijan viery jevanhielskaj da siłavikoŭ. Bałsanaru abiacaŭ navieści šorachu ŭ karumpavanym palityčnym isteblišmiencie.
Bałsanaru vystupaje suprać mnohaha z taho, što stała normaj dla libieralnych i sacyjalistyčnych kołaŭ. U pryvatnaści, jon sfarmiravaŭ urad na tracinu ź siłavikoŭ, choča abmiežavać dazvolenyja padstavy dla abortaŭ, vyjści z Paryžskaha pahadnieńnia pa baraćbie z paciapleńniem klimatu, palehčyć nabyćcio zbroi pryvatnymi asobami, krytykuje hiejaŭ i źbirajecca prybrać sa školnaj prahramy kurs połavaha vychavańnia. Jon vystupaje suprać usiaho taho, što nazyvaje «kulturnym marksizmam», a ŭ našym rehijonie zvyčajna nazyvajuć «libieralizmam».
U śfiery ekanomiki novy prezident abiacaje maštabnuju pryvatyzacyju i źmianšeńnie dziaržaŭnych vydatkaŭ.
210-miljonnaja Brazilija stanovicca ekśpierymientalnaj placoŭkaj novaha kansiervatyzmu. Birža adreahavała na prychod novaha prezidenta vialikim rostam.
