Uładzimier Zialenski źbiraje pratestavyja hałasy.
U trojcy lidaraŭ prezidenckaj honki va Ukrainie źmieny. Jak pakazała apytańnie sacyjałahičnaj słužby Greenberg / Quinlan / Rosner, rejtynh Julii Cimašenka źnižajecca, a voś šoŭmen Uładzimir Zialenski staŭ vyraznym lidaram vybarčych simpatyj.
Na siońnia za Zialenskaha hatovyja prahałasavać 28% vybarcaŭ, jakija hatovyja pryjści na ŭčastki. Z adryvam ad jaho na druhim miescy idzie dziejny prezident Piatro Parašenka (18%) i Julija Cimašenka (15%).
Na starcie prezidenckaj honki napieradzie išła Cimašenka.
Rejtynhi astatnich kandydataŭ zastajucca praktyčna niaźmiennyja.
Jury Bojka, jaki abapirajecca na prarasijskich vybarcaŭ uschodu i poŭdnia, źbiraje 9%.
Były ministr abarony Hrycenka, jakoha padtrymlivajuć antyaliharchičnyja i prazachodnija koły, — 8%.
Papulist Laško moža raźličvać na 6%.
Mer Lvova Sadovy nabiraje 3% hałasoŭ.
Jašče 3% vybarcaŭ padzielenyja miž dvuma inšymi kandydatami z kołaŭ byłoj Partyi rehijonaŭ, heta Viłkuł (karaniami jon z Kryvoha Roha) i Murajeŭ (Charkaŭ).
Kandydat ad nacyjanalistaŭ z abjadnańnia «Svaboda» Kašulinski moža raźličvać na 1% hałasoŭ, jak i były kiraŭnik Słužby biaśpieki Ukrainy Nalivajčanka, jaki taksama abapirajecca na patryjatyčny elektarat.
Piatro Parašenka karystajecca najbolšaj padtrymkaj u Kijevie, na zachadzie i ŭ centry Ukrainy. Jon u svajoj ahitacyi robić akcent na ŭmacavańnie armii, jakaja paśpiachova trymaje abaronu na linii raźmiežavańnia ŭ Danbasie, i nacyjanalnaj identyčnaści. U pryvatnaści, jamu ŭdałosia dabicca pryznańnia aŭtakiefalnaj pravasłaŭnaj carkvy. Akramia taho, Parašenka padkreślivaje, što ŭdałosia dabicca ekanamičnaj stabilizacyi, zarobki rastuć, a dola cienievaj ekanomiki rekordna ŭpała. Krytyki Parašenki vinavaciać jaho ŭ kansiervacyi aliharchičnaha kantrolu nad ekanomikaj i vyvadzie srodkaŭ u afšory.
Zialenski najbolš papularny na poŭdni i ŭschodzie Ukrainy. Krytyki adznačajuć jaho ciesnuju suviaź z aliharcham Iharam Kałamojskim. Šou Zialenskaha vychodzić na telekanale, jaki naležyć Kałamojskamu. Akramia taho, stavicca pad sumnieŭ zdolnaść Zialenskaha być hałoŭnakamandujučym.