Ukrainskich i biełaruskich piensijanieraŭ, jakija pastajanna pražyvajuć u Litvie, z 2020 hoda prapanujuć lačyć biaspłatna, navat kali jany nikoli nie płacili litoŭski padatak na abaviazkovaje strachavańnie zdaroŭja. Ich zdaroŭje budzie zastrachavana za dziaržaŭny košt, jak i ŭ litoŭskich piensijanieraŭ, piša DELFI.
Hetuju i inšyja papraŭki, padrychtavanyja pradstaŭnicaj «ahraryjaŭ» Vidaj Ačenie, padtrymaŭ kamitet biudžetu i finansaŭ u Siejmie Litvy. Kali ich prymie Siejm, u biudžecie treba budzie praduhledzieć dadatkova 690 tysiač jeŭra.
Pa słovach Ačenie, jana kiravałasia tym, što dahetul nie ažyćcioŭleny dahavor Litvy z Ukrainaj i Biełaruśsiu, jaki praduhledžvaje, što ŭkraincy i biełarusy piensijnaha ŭzrostu majuć prava być zastrachavanymi abaviazkovym strachavańniem zdaroŭja, kali jany ŭvieś čas pražyvajuć u Litvie. Dahavor Litvy ź Biełaruśsiu ratyfikavany ŭ 1999 hodzie, z Ukrainaj — u 2001 hodzie.
Ciapierašni zakon ab strachavańni zdaroŭja hetaha nie praduhledžvaje, a ŭ Litvie pražyvajuć kala 800 hramadzian Biełarusi i Ukrainy mužčynskaha połu, starejšych za 60 hadoŭ, i kala 1050 žančyn, starejšych za 55 hadoŭ.
Pa słovach «ahraryja» Valusa Ažuołasa, papraŭki źjaŭlajucca vielmi aktualnymi. Pavodle jaho słoŭ, u Litvu prybyvaje ŭsio bolš ukraincaŭ. «My pryciahnuli miedykaŭ i z Ukrainy, i ź Biełarusi, i situacyja składajecca takaja, što čaściej za ŭsio pryjazdžajuć siemjami, pryvoziać baćkoŭ-piensijanieraŭ, kab tam ich nie pakidać, ale hetyja ludzi tut pavisajuć», — kazaŭ Ažuołas na pasiadžeńni kamiteta.
U toj ža čas kansiervatar Mikałas Majaŭskas ličyć, što heta zaachvocić ukraincaŭ i biełarusaŭ jechać u Litvu na pastajannaje miesca žycharstva, kab biaspłatna lačycca, bo tut «pasłuhi značna lepšyja».
«Asabliva ludziam stałaha ŭzrostu, jakim hetyja pasłuhi patrebnyja ŭsio čaściej, i ŭ paraŭnańni ź jakaściu tych pasłuh u Biełarusi i Litvie, moža być vialikaja dadatkovaja matyvacyja jechać siudy nie zastrachavanymi», — kazaŭ Majaŭskas.
Lidar frakcyi Vybarčaj akcyi palakaŭ Litvy — Sajuza chryścijanskich siemjaŭ Ryta Tamašunienie zasumniavałasia, što jakaść pasłuh miedycyny ŭ Biełarusi horšaja: «Jość miedycynski turyzm ź Litvy ŭ Biełaruś. I pahladzicie, jakija patoki».
Jurysty Siejma papraŭki krytykujuć.
Departamientam prava pastaŭlena pad sumnieŭ, ci nieabchodna za dziaržaŭny košt strachavać piensijanieraŭ ź inšaj krainy, jakija nie stvarali sacyjalna-ekanamičnaha dabrabytu Litvy, u tym liku i zabiaśpiečanych piensijanieraŭ-zamiežnikaŭ.
Adznačajecca, što ŭ Litvie zastrachavanym za dziaržaŭny košt asobam štohod vypłačvajecca pa 373,1 jeŭra.
