Były deputat ad Partyi rehijonaŭ i eks-kiraŭnik administracyi byłoha prezidenta Ukrainy Viktara Janukoviča Andrej Klujeŭ, jakoha z 2014 hoda šukaje Słužba biaśpieki Ukrainy (SBU), byŭ zarehistravany Centralnaj vybarčaj kamisijaj jak kandydat u deputaty Viarchoŭnaj Rady, paviedamlaje «RBK-Ukrajina».
Klujeŭ ličycca jak kandydat ad Libieralnaj partyi Ukrainy pa mažarytarnaj akruzie ŭ horadzie Bachmut (były Arciomaŭsk), što znachodzicca ŭ Danieckaj vobłaści niepadalok ad linii raźmiežavańnia. Rašeńnie ab rehistracyi palityka było pryniata paśla taho, jak Viarchoŭny sud Ukrainy abaviazaŭ CVK paŭtorna razhledzieć jaho dakumienty. U kamisii adznačyli, što inšyja sposaby vykanańnia rašeńnia suda, akramia jak rehistracyja Klujeva, u jaje adsutničajuć.
Akramia taho, Centrvybarkam pryniaŭ rašeńnie dapuścić da vybaraŭ błohiera Anatola Šaryja, što zajmaje pieršy numar u śpisie Partyi Šaryja, jakomu raniej taksama było admoŭlena ŭ rehistracyi. Jak i ŭ vypadku z Klujevym, rašeńnie było pryniata paśla adpaviednaj pastanovy Viarchoŭnaha suda.
Abodva palityki — Klujeŭ i Šaryj — praśledujucca pravaachoŭnymi orhanami Ukrainy.
Ukrainski vałancior Raman Sinicyn zaklikaŭ vychodzić na Majdan u 20.00 suprać rehistracyi kandydatami ŭ deputaty Anatola Šaryja i Andreja Klujeva.
«Zarehistravali, choć jany nie žyli apošnija 5 hadoŭ va Ukrainie i pa zakonie naohuł nie mieli nijakich šancaŭ być zarehistravanymi. A ŭ hety čas z turmaŭ vypuskajuć terarystaŭ i zabojcaŭ niabiesnaj sotni. Ja hetaha ciarpieć nie źbirajusia», — napisaŭ Sinicyn ŭ Facebook.
