Fota: Majia Kachno, TUT.BY
U Minsku pravodziać rekanstrukcyju z restaŭracyjaj budynka himnazii-kaledža na płoščy Svabody, 7.
Dvuchpaviarchovuju škołu ŭ składzie kompleksu jezuickaha kalehiuma pabudavali jašče u 1699 hodzie. Z kanca XVIII stahodździa tut byŭ Dom hubiernatara, u 1918 hodu raźmiaściŭsia Narodny sakrataryjat BNR, z 1919 pa 1933 hod tut byli CVK BSSR, Saŭnarkam i inšyja dziaržaŭnyja centralnyja ŭstanovy.
Paśla vajny tut raźmiaščałasia škoła, u 1968 hodzie jaje pierabudavali — budynak vyras na dva pavierchi.
1918 hod, budynak kala kaścioła jašče dvuchpaviarchovy. Fota: z archivaŭ krajaznaŭcy Paŭła Rastoŭcava.
Razmovy ab rekanstrukcyi hetaha budynka išli daŭno. U 2014 hodzie byŭ zaklučany dahavor z «Minskprajektam», ale aktyŭnych rabot nie było.
U 2019 hodzie opierny śpiavak, salist Vialikaha teatra Biełarusi Uładzimir Hromaŭ paprasiŭ prezidenta paskoryć praces zaviaršeńnia ramontu himnazii-kaledža, tak jak pracy pa abnaŭleńni abjekta iduć bolš za dziesiać hadoŭ. Alaksandr Łukašenka daručyŭ kiraŭniku horada Anatolu Sivaku ŭziać pytańnie na asabisty kantrol i zaviaršyć rekanstrukcyju da kanca hoda.
Fota: Dźmitryj Bruško, TUT.BY
Abjekt ŭklučyli ŭ dziaržaŭnuju inviestycyjnuju prahramu na 2019 h., na jaho praduhledžana vydzielić 1,5 miljona rubloŭ, u 2020-m — 7,5 miljona rubloŭ. Kaštarysny košt ukazana ŭ cenach 2017 hoda.
Nadbudovy zachavajuć, na fasad dadaduć lapninu
Aktyŭnyja raboty na Svabody, 7 pačalisia ŭ lipieni, zaviaršyć rekanstrukcyju płanujuć u 2020 hodzie.
Dyrektar Upraŭleńnia kapitalnaha budaŭnictva Centralnaha rajona Andrej Siemaščuk raspaviadaje: pavierchi, nadbudavanyja ŭ 1960-ch, pakinuć. Histaryčny fasad budynka i jaho pieraŭtvareńnia abyhrajuć.
Fota: kiraŭnik administracyi Centralnaha rajona Dźmitryj Piatruša, telehram-kanał t.me/minsk_new.
— Budzie rekanstrukcyja fasada z dadańniem elemientaŭ lapniny, jakaja pieršapačatkova była na budynku. Taksama pamianiajem usie vokny z boku płoščy Svabody. Unutry budzie kapitalny ramont, pakryćcia i pieraharodki zamieniać. Akramia taho, abjekt pavinien być prydatnym pa normach dla muzyčnaj škoły, — raspavioŭ dyrektar UKB.
Za vyjavami budučaha budynka, pakul prajekt znachodziŭsia na ekśpiertyzie, surazmoŭca parekamiendavaŭ źviarnucca ŭ Ministerstva kultury.
Adnoviać frahmient fasada XVIII-XIX stahodździaŭ
U Minkulcie dać ilustracyi z prajektu admovilisia, spasłaŭšysia na toje, što dakumientacyja źjaŭlajecca słužbovaj.
Viadoma, što Minkult vydaŭ stanoŭčaje zaklučeńnie pa prajektnaj dakumientacyi abjekta. Nam na słovach patłumačyli, jak budzie vyhladać budynak paśla rekanstrukcyi.
Fota: Leŭ Daškievič, z fondaŭ Nacyjanalnaha histaryčnaha muzieja 1926
«Pryniatyja prajektnyja rašeńni dazvolili vyjavić i maksimalna ŭznavić u abjomie sučasnaha budynka frahmient fasada XVIII-XIX stahodździaŭ, vizualna abjadnaŭšy jaho z budynkam raźmieščanaha pobač kaścioła Najśviaciejšaj Panny Maryi i źnivieliravać isnujučy kantrast jaho roznačasovych pierabudoŭ», — skazana ŭ liście Minkulta.
U «Minskprajekcie» admovilisia dać kamientary i dać ilustracyi prajekta.
Kampramis pamiž sučasnaj funkcyjaj i histaryčnym budynkam
Raspavioŭ, jak budzie vyhladać abjekt, hałoŭny architektar prajektaŭ u navukova-praktyčnym centry «Restabilis» Raman Zabieła. Jon kiravaŭ raspracoŭkaj navukova-prajektnaj dakumientacyi pa rekanstrukcyi z restaŭracyjaj muzyčnaj himnazii-kaledža.
Render: facebook.com/r.zabiela
Raman Zabieła paćvierdziŭ, što ŭsie prybudovy i nadbudovy zachavajuć. Na hałoŭnym fasadzie pamianiajucca pamiery i raźmiaščeńnie prajomaŭ — u adpaviednaści z histaryčnym rašeńniem. Pravuju častku histaryčnaha fasada adnoviać u poŭnym abjomie, dla hetaha zakłaŭšy vokny na trecim paviersie. Na astatnich fasadach stračanyja histaryčnyja prajomy i karnizy pakažuć z dapamohaj roznych restaŭracyjnych pryjomaŭ.
Koler doma budzie blizkim da taho, što ŭ kaścioła, a voś nadbudovu vydzielać inšym koleram.
— Unutry budynka na histaryčnych ścienach tynkoŭku zachavajuć, kab nie paškodzić mahčymyja rośpisy, kali jany tam jość, i pakinuć mahčymaść ich daśledavać budučym pakaleńniam, — raspavioŭ Raman Zabieła. — Abjekt važny i składany. U 1960-ch hadach budynak XVIII-XIX stahodździaŭ kardynalna pierabudavali. Źnieśli ŭsie pierakryćci i źbili dekor, zastałasia tolki skrynka budynka. Novyja pavierchi byli značna nižej, tak što histaryčnaja dvuchpaviarchovaja častka stała trochpaviarchovaj. Vychodzić, histaryčnyja vokny razrazajucca zaraz pierakryćciami, a vokny treciaha paviercha źjavilisia tam, dzie ich raniej nie było. Taksama byŭ nadbudavany vysoki pavierch kancertnaj zały.
Składanaść u tym, jak uznavić fasady XVIII-XIX stahodździaŭ, jakija całkam nie adpaviadaje sučasnaj raźbiŭcy prajomaŭ. Pry hetym važna zachavać funkcyi budynka nia zrušyć sučasnyja strohija normy ekspłuatacyi navučalnych ustanoŭ.
Na tarcy himnazii možna zaŭvažyć histaryčnyja nišy voknaŭ, jakija nie supadajuć ź pierabudavanym fasadam budynka. Fota: Majia Kachno, TUT.BY
Architektaram taksama treba było ŭličyć i susiednija abjekty.
— Isnujučaja zabudova hetaha boku płoščy sfarmavałasia ŭ 1950-1960-ch. Pry hetym budynak kaścioła taksama pierabudavali. Zaraz kaściołu viernuta pieršapačatkovaje abličča, a savieckija budynka sprava i źleva ŭžo majuć achoŭny status historyka-kulturnaj kaštoŭnaści. Kali budzie vyjaŭleny fasad XVIII-XIX stahodździaŭ, heta jak raz abjadnaje baročny jezuicki kompleks i savieckuju zabudovu sprava i źleva, pakazaŭšy ŭsie etapy farmiravańnia płoščy.
Paśla zakančeńnia rekanstrukcyi ŭ budynku praciahnie pracu Respublikanskaja himnazija-kaledž pry Biełaruskaj dziaržaŭnaj akademii muzyki.
— Pierad prajekciroŭščykami staviłasia zadača nie ŭznavić pomnik papiarednich stahodździaŭ, a skončyć rekanstrukcyju navučalnaj ustanovy. Maštabnyja pracy na abjekcie pravodziacca pieršy raz za apošnija paŭstahodździa. Hetuju mahčymaść vykarystoŭvali dla vyjaŭleńnia histaryčnaha abjomu adnaho z samych starych budynkaŭ Minska i detalovaha ŭznaŭleńnia jaho admietnych elemientaŭ. U vyniku atrymajecca kampramis pamiž sučasnaj funkcyjaj i histaryčnym budynkam, — raspavioŭ Zabieła.
