Minsk praciahvaje banalna manieŭravać miž Rasijaj i Zachadam.
Tak, Łukašenka ŭ Maskvie, kab atrymać kredyt dy inšyja prefierencyi, musiŭ pahadzicca na adzinuju z Rasijaj rehijanalnuju sistemu supraćpavietranaj abarony.
Razam z tym ministr zamiežnych spraŭ Siarhiej Martynaŭ nieŭzabavie ŭ Vilni budzie abmiarkoŭvać Uschodniaje partniorstva — novy prajekt ES, što maje na mecie anhažavać i Biełaruś.
Uviečary 3 lutaha, paśla sustrečy Łukašenki ź Miadźviedzievym, toj samy Martynaŭ enierhična abviarhaŭ paviedamleńni rasijskich ŚMI pra nibyta padpisany płan uviadzieńnia adzinaj valuty. Maŭlaŭ, heta niekarektnaja žurnalisckaja interpretacyja, nasamreč havorka idzie tolki pra mahčymaje nadańnie rasijskamu rublu statusu reziervovaj rehijanalnaj valuty.
Impet ministra zrazumieły: adziny rubiel — heta znak zdačy, finansavaj (i nie tolki) kapitulacyi pierad Maskvoj. Zachadu ž treba pasłać sihnał: nie, Kreml nas hołymi rukami nie voźmie!
Nie budziem rytualna paŭtarać tezu pra nieprazrystaść biełaruska-rasijskich dačynieńniaŭ, što samo pa sabie stvaraje atmaśfieru piermanientnaj tryvohi ŭ asiarodździ niezaležnikaŭ. Adznačym tolki, što, va ŭsiakim razie, u aficyjnym pieraliku padpisanych u Maskvie dakumientaŭ takoha płanu niama.
Na praktycy ž zhoda na adziny rubiel moža być vycisnutaja, kali biełaruskija finansy kančatkova zaśpiavajuć ramansy.
U pytańni pra adzinuju rehijanalnuju sistemu supraćpavietranaj abarony Minsk taksama doŭha i pa-majstersku vałavodziŭ. Adna reč — hałasłoŭna zajaŭlać pra hatoŭnaść biełarusaŭ lehčy pad tanki dziela Maskvy (vierbalnyja dekłaracyi da spravy nie pryšyješ, dy i adkul tyja tanki voźmucca). I zusim inšaja reč — kali treba de-fakta achviaravać dolaj suvierenitetu ŭ vajskovaj śfiery. Va ŭsiakim razie, heta musić być dobra prapłačana, biez ekivokaŭ padkreślivaŭ Łukašenka.
Tak što niespadzieŭkaj heta damova stała tolki dla dyletantaŭ. Ekśpierty viedajuć: uparty handal vakoł adzinaj sistemy SPA išoŭ daŭno. Usio upirałasia ŭ canu pytańnia. Jašče ŭ kastryčniku 2007 hoda Łukašenka tłumačyŭ rasijskim žurnalistam: «Zaraz Rasija pastaviła pytańnie: u vas dobraja supraćpavietranaja abarona, a u nas u hetym napramku ničoha niama, tamu treba zrabić supolna, kab biełaruskija SPA faktyčna ŭvajšli ŭ skład rasijskich. Ja kažu: heta kaštuje hrošaj».
Tak jano i atrymałasia.
3 lutaha Maskva, jakaja pierad hetym i słuchać nie chacieła pra novyja pazyki, raptoŭna padabreła i vusnami pamočnika Miadźviedzieva — Siarhieja Prychodźki paabiacała nieŭzabavie jašče adzin kredyt na niekalki dziasiatkaŭ miljardaŭ rasijskich rubloŭ. Pytańnie prapłačana.
Dla Jeŭropy damova pra adzinuju SPA nie jość šokavaj navinoj. De-fakta vojski supraćpavietranaj abarony dźviuch krain i dasiul ščylna kaardynavali svaje dziejańni.
«Toje, što Minsk pryviazany ŭ vajskovaj śfiery da Maskvy — heta reč viadomaja. Uzrovień intehracyi tut davoli vysoki, tamu takich rečaŭ možna było čakać. Stvareńnie sumiesnaj SPA nie stała siensacyjaj dla zachodnich naziralnikaŭ», — zajaviŭ u efiry «Radyjo Svaboda» polski ekśpiert Vojcech Barodzič-Smaliński.
Dadamo: nie varta miašać bob z harocham — błytać SPA z supraćrakietnaj abaronaj, jak heta čaściakom robiać nie tolki abyvatali, ale i žurnalisty.
Uciahvańnie Biełarusi ŭ «asimietryčny adkaz» Maskvy na płany ZŠA u halinie supraćrakietnaj abarony sapraŭdy pastaviła b na vušy jeŭrapiejskich palitykaŭ i biurhieraŭ. Ale zaraz havorka pra heta nie idzie. Naadvarot, Kreml sprabuje załahodzić pytańnie z Abamam, novym čałaviekam u Biełym domie, bo hrošaj na honku ŭzbrajeńniaŭ va ŭmovach kryzisu ŭ Rasii absalutna niama.
Damova ž pra adzinuju SPA maje dla Kramla vialiki pijaraŭski, imidžavy składnik. Maŭlaŭ, choć niejki praryŭ na postsavieckim absiahu, a to ŭsie naŭkoł tolki i robiać, što aktyŭna Rasiju nie lubiać.
«Nijakaj vajennaj nieabchodnaści ŭ stvareńni hetaj abjadnanaj sistemy niama. Skažu bolš žorstka: z vajennaha punktu hledžańnia hetaja zaduma prosta biessensoŭnaja», — skazaŭ na «Svabodzie» rasijski vajskovy ekśpiert Alaksandr Holc. Ź jaho słoŭ, usia hetaja kaša zavarana tamu, što «treba pradstavić niejkija śviedčańni nieparušnaha siabroŭstva Biełarusi i Rasii».
Padobnymi matyvami tłumačycca i presinh Maskvy ŭ pytańni pryznańnia Abchazii dy Paŭdniovaj Asiecii. Dla Kramla sprava pryncypu, kab biełaruski sajuźnik zaśviedčyŭ tut svaju addanaść.
Inačaj śmiechatvornym vyhladaje zaćviardžeńnie na tych najvyšejšych dziaržradach niejkich prahram supolnych dziejańniaŭ u halinie zamiežnaj palityki.
I ŭ hetym pytańni Minsk taksama virtuozna ciahnie ryzinu. Va ŭsiakim razie, mara niaŭrymślivaha Kakojty nie spraŭdzicca raniej za krasavik. Miž tym chodziać razmovy, što ES moža daterminova — užo ŭ lutym ci sakaviku — pastavić Minsku zalik za testavy pieryjad. Brusiel nadta nie choča, kab ciahnik narmalizacyi spyniŭsia.
Cikavy štrych: pierad adlotam u Maskvu Łukašenka ŭ pažarnym paradku daŭ intervju «Jeŭrańjus» (pratačyłasia infarmacyja, što spačatku tamtejšyja televizijniki płanavali intervju až na sakavik).
Aktyŭnaja faza vialikich zimovych manieŭraŭ doŭžycca.
