Fota Nadziei Bužan
U Biełarusi zaćvierdžany sanitarna-epidemijałahičnyja patrabavańni da ŭtrymańnia i ekspłuatacyi ŭstanoŭ adukacyi, jany zamacavany ŭ pastanovie ŭrada ad 7 žniŭnia, paviedamlaje interfax.by.
Što da škoł, to adnym z momantaŭ, rehłamientavany pastanovaj, źjaŭlajecca zabarona druhoj źmieny ŭ I, II, V, IX—XI kłasach, a taksama ŭ VIII kłasach z vyvučeńniem asobnych vučebnych pradmietaŭ na pavyšanym uzroŭni.
Druhaja źmiena dapuskajecca ŭ VI—VII kłasach pry ŭmovie zabieśpiačeńnia aptymalnaha režymu navučańnia. «Fakultatyŭnyja zaniatki na praciahu navučalnaha tydnia pavinny pravodzicca ŭ dni z najmienšaj kolkaściu vučebnych zaniatkaŭ», — havorycca ŭ pastanovie.
Dakumientam zabaraniajecca praviadzieńnie zaniatkaŭ pa fizkultury ciaham dvuch dzion zapar u adnym kłasie i bolš za adzin raz na tydzień pieršymi abo apošnimi navučalnymi zaniatkami.
Navučalnyja pradmiety, jakija patrabujuć vialikaha razumovaha napružańnia, zasiarodžanaści i ŭvahi (matematyka, ruskaja, biełaruskaja, zamiežnaja movy), pavinny vyvučacca ŭ I—IV kłasach pieravažna na druhim i trecim urokach.
U V—XI kłasach kožny z pradmietaŭ, jakija patrabujuć vialikaha razumovaha napružańnia, zasiarodžanaści i ŭvahi (matematyka, ruskaja, biełaruskaja, zamiežnaja movy, fizika, chimija), dapuskajecca vyvučać na pieršym ci apošnim navučalnym zaniatku nie čaściej za adzin raz u tydzień u adnym kłasie.
Zhodna z pastanovaj, vučni I—IV kłasaŭ nie pavinny siadzieć uvieś hod na adnym miescy, dvojčy (u vieraśni i studzieni) ich pavinny rassadžvać z ulikam rostu i rekamiendacyj doktara.
U pastanovie taksama zamacavana, što kantrolnyja raboty (za vyklučeńniem ustanoŭ dla darosłych), kursavyja raboty, zaliki i ekzamieny pavinny pravodzicca ŭ adpaviednaści z hrafikam i nie bolš čym pa adnym vučebnym pradmiecie ŭ dzień u adnym kłasie/hrupie.
Zabaronienyja kantrolnyja, zaliki, abarona kursavych i h.d. u piatnicu i na apošnich hadzinach vučebnych zaniatkaŭ.
