Ludmiła Tarakanava — dyzajnierka, dacent kafedry dyzajnu i mody Viciebskaha dziaržaŭnaha technałahičnaha ŭniviersiteta. Fota Darji Ratušynaj.
Pra biełaruskich mužčyn na vulicach
Pierš za ŭsio zaŭvažaju, što mała dahledžanych mužčyn. U asnoŭnym jany zamaročanyja niejkimi kłopatami i mała ŭvahi nadajuć svajmu źniešniamu vyhladu. Jany pryvykli adziavacca ŭ praktyčnyja rečy, džynsy, majki, mała chto pradumvaje vobraz. Mnie chaciełasia b, kab mužčyny bolš cikavilisia padboram aksiesuaraŭ: ramianioŭ, zaplečnikaŭ, partfielaŭ, papak.
U Jeŭropie, naprykład, vialikuju značnaść nadajuć jakaści kaściuma. Chaj heta budzie darahaja reč, ale jana budzie nasicca doŭhi čas. Na žal, u suviazi z bytam, moža, niejkimi finansavymi abstavinami, našy mužčyny hetamu nie nadajuć uvahi.
Pakaz Ludmiły Tarakanavaj u ramkach Biełaruskaha tydnia mody. Fota Voli Aficeravaj.
Pra toje, čamu našy mužčyny nie cikaviacca modaj
Dumaju, usio zakładvajecca na ŭzroŭni vychavańnia. Naša asiarodździe ściraje mahčymaści navučyć junakoŭ źviartać na siabie ŭvahu, niama kultury značnaści kaściuma. U toj ža Italii pieravaha addajecca dziełavomu stylu. Zrazumieła, što źniešni vyhlad ofisnaha supracoŭnika i rabočaha budzie adroźnivacca. Ale navat kali ty hladziš na tamtejšaha manciora, jon taksama dobra apranuty, niama hetaj «abyjakavaści». Usio čysta, akuratna. Napeŭna, tamu, što bolšaść italjancaŭ maje mahčymaść chutčej źmianiać kaścium.
A našy mužčyny pryvykli adziavać adnu i tuju ž reč. «Navošta ty mnie novuju kašulu prapanuješ? U mianie jość užo». Pakul jany abutak nie satruć daščentu, kali ŭžo padešvy advalvajucca, jany ničoha inšaha sabie nie kupiać.
Biełaruskich mužčyn składana adziavać. Rastłumaču čamu. Kali mužčyna pryvyk nasić štany z pasadkaj na ściohnach, ty nijakaj tendencyjaj jaho nie pierakanaješ. Biełarusy vielmi ŭpartyja. Samcy, hruba kažučy. Adzinki mohuć pačuć mierkavańnie starońniaha čałavieka.
Składanaść jašče ŭ tym, što našy mužčyny pryvykli da niaźmiennaści asartymientu. Kali chtości nosić majki, spatrebicca šmat času, kab pierakanać jaho, što ciapier modnyja kašuli. Jon pavinien ubačyć, što hetaja kašula źjaviłasia ŭ svata, brata, siabra, i potym tolki pačnie dumać: čamu b i mnie heta nie zajmieć? Spracoŭvaje niejkaja kalektyŭnaść.
Pra apošnija trendy
Na pieršy płan vychodzić spartovy styl. I mužčyny padtrymlivajuć hety trend. Čym mienš času na siabie zatračvajuć, tym bolš im heta padabajecca.
Kali sačyć za vastramodnymi napramkami, to viartajecca palito sa spuščanaj linijaj plača ŭ duchu 60-ch hadoŭ. Aktualnaja daŭžynia palito i płaščoŭ — nižej za kalena. Zamiest zavužanych štanoŭ u trend uvachodziać šyrokija, tak zvanyja truby abo siłuetu morkva (sa składkami naviersie). Papularnyja štany-kiułoty — šyrokija i ŭkaročanyja. Jany dobra miksujucca z fufajkami.
Vielmi modnyja bombiery z roznaha materyjału — trykatažnyja, skuranyja, drapavyja. A taksama viazanyja rečy: staŭku treba rabić na bujnoje, fakturnaje placieńnie.
Trend na bujnuju viazku i kvietkavy prynt. Fota Voli Aficeravaj.
Aktualnyja buduć pinžaki z dvuchbortnaj zašpilkaj, na adzin ci dva šerahi huzikaŭ. Kali raniej akcent rabiŭsia na ablahańni, to zaraz na pavieličeńni plečavaha pojasa — viartajemsia da trochi miechavatych pinžakoŭ 90-ch hadoŭ.
Fota vogue.ru.
U trendzie i mužčynskija kašuli z kaŭniarami na stojcy na dva huziki i z padoŭžanymi vuhłami kaŭnierykaŭ u duchu 70-ch. Vielmi papularnyja holfy — ich nosiać pad płašč abo pinžak. Śmieła hladziacca kantrasnyja spałučeńni: kali ŭ vas płašč małočnaha koleru, to holf moža być malinavy, limonny, błakitny. Monałuki (kali ŭvieś vobraz padabrany ŭ adnym kolery. — Nina) taksama zastajucca ŭ trendzie. Tolki vybirać lepš nie kidkija kolery, a strymanyja, vysakarodnyja, nasyčanyja — naprykład, ciomna-fijaletavy. Akcent treba rabić na spałučeńni roznych materyjałaŭ i faktur.
Z abutku ŭ pieršuju čarhu ŭ modzie krasoŭki. Na dadzieny momant heta niezamiennaja reč. Łofiery (tufli zakrytaha typu), konviersy (vysokija kiedy) taksama aktualnyja. Ich dobra padbirać pa kantraście — naprykład, pad čornyja štany i čorny švedar abuvać čyrvonyja ci sinija konviersy.
Jašče ŭ modzie kiepki, jakija raniej nasili taksisty — čatyry- abo šaściklinki, sa skuranymi brylami.
Vialiki akcent robicca na eka-dyzajn. Naturalnaja skura zamianiajecca eka-skuraj na trykatažnaj asnovie.
Z malunkaŭ aktualnyja kvietkavy i zaałahičny matyŭ (leapard, ziebra). Heta moža być kamizelka z pryntom, halštuk, papka abo remień — i hetaha budzie dastatkova.
Viedajecie, što mianie ździviła ŭ Bierlinie? Maścierki ź sinimi, čyrvonymi, zialonymi ŭstaŭkami i z abjomnymi rukavami, jakija my nasili ŭ 90-ja hady, tam ciapier prosta na ŭra. Jany raźbirajucca na barachołačnych rynkach u pieršuju čarhu.
Pra mužčynskija spadnicy i kansiervataraŭ
Mužčynskija spadnicy i tuniki kuplajuć, jak praviła, tvorčyja ludzi — viadučyja, akciory, jakija viedajuć, što mužčyny raniej nasili takija rečy. U 18—19 stahodździach kaścium nazyvaŭsia sukienkaj. Z časam mužčynskaja sukienka pierajšła ŭ žanočy harderob. I zaraz ja chaču viarnuć hetuju situacyju, pakazać, što spadnicy mohuć pryhoža hladziecca nie tolki na dziaŭčatach. Ja ž nie prapanuju adziavać spadnicy na hołaje cieła — ja vypuskaju ich u kamplekcie ź inšymi rečami, štanami, naprykład.
Nasielnictva ŭ nas dzielicca na try katehoryi spažyŭcoŭ: avanhardysty, pamiarkoŭnyja i kansiervatary. Dyk voś bolšaść našych mužčyn — heta kansiervatary, na žal. Avanhardystaŭ, ja dumaju, pracentaŭ piać, nie bolš.
Čamu mužčyny nie navažvajucca nasić spadnicy? Jany bajacca acenki svaich siabroŭ i znajomych, pieražyvajuć, što ich paličać nienarmalnymi. Bajacca być pasaromlenymi, adchilicca ad normy. A nakont mužnaści… Kali fizičnaja abałonka ŭ normie, biez raspuščanaści žyvata i tłuščavych adkładaŭ — voś heta ja liču mužnym. I jašče mnie padabajecca, kali kašuli zapraŭlenyja ŭ štany z remieniem.
Pra adzieńnie, jakoje para vykinuć sa svajho harderobu
U pieršuju čarhu mužčynam treba pazbavicca ad zanošanych rečaŭ — z hałuškami, praciortaściami. Jany dajuć nalot nievysakarodnaści.
A jašče mianie pryvodziać u šalenstva treniki z łampasami i plažnyja anučnyja šorty, jakija zusim nie trymajuć formy. Jany vyhladajuć jak mužčynskija trusy. Zdajecca, što akramia ich mužčyny letam u horadzie naohuł ničoha nie nosiać, jak byccam niama dobrych šortaŭ sa strełkami, cikavymi kišeniami abo nakładnymi detalami ŭ styli safary.
Pra pakazčyk dobraha hustu
U zamiežnikach časta kidajecca ŭ vočy dobry šalik abo halštuk. U hetym jakraz i vyjaŭlajecca hust — kali mužčyny nadajuć uvahu aksiesuaram. I inšaja važnaja prykmieta — vytrymanaść kalarovaj hamy vobrazu. Hust — heta pakazčyk vybiralnaści.
