Fota z fejsbuka Džanłuidžy Bufona
Hałkipier «Juvientusa» Džanłuidžy Bufon napisaŭ dla The Player's Tribune simvaličny list sabie 17-hadovamu, dzie siarod inšaha raspavioŭ nie tolki pra svoj šlach da suśvietnaha futbolnaha alimpa, ale i pra toje, jak mastak Mark Šahał i adna z samych viadomych jaho karcin źmianili jaho žyćcio.
U liście Bufon jak by pieraścierahaje siabie maładoha ad pamyłak maładości, piša ab zachapleńni futbołam, rašeńni stać mienavita hałkipieram. Daje parady, jak zmahacca z depresijaj, fizičnaj stomlenaściu, nie rabić nieabdumanych palityčnych žestaŭ, navat jak zmahacca z zornaj chvarobaj. Całkam list tut.
Jon raić bolš uparta treniravacca, mienš chadzić pa načnych kłubach, nie kanfliktavać z palicyjaj paśla viečarynak. A voś adna paradaŭ fienamienalnaja i niečakanaja, jakaja spatrebicca paśla pierajezdu budučaj zorki suśvietnaha futboła z Parmy ŭ Turyn.
«Padčas tvajoj depresii zdarycca niešta dziŭnaje i cudoŭnaje. Adnojčy ty vyrašyš syści ad ruciny i pajści ŭ inšy restaran na śniadanak. Pojdzieš novaj darohaj pa Turynie, i pryjdzieš da muzieja mastactvaŭ. Na ścianie budzie visieć afiša — ŠAHAŁ.
Ty raniej čuŭ hetaje proźvišča. Ale ty ničoha nie viedaješ pra mastactva. Heta samaja važnaja častka majho lista. Ty pavinien zajści ŭ muziej, mienavita ŭ hety dzień.
Heta źmienić tvajo žyćcio nazaŭsiody.
Kali nie zojdzieš, to praciahnieš być futbalistam, Supiermenam, jaki chavaje pačućci. Tvaja duša pamre.
Ale zajdzi — i ŭbačyš sotni karcin Šahała. Bolšaść ciabie nie začepiać. Jość dobryja, jość cikavyja, jość nie vartyja.
A potym ty ŭbačyš karcinu, i heta budzie ŭdar małanki.
Jana nazyvajecca «Prahułka».
Jaje byccam namalavała dzicia. Mužčyna i žančyna ŭ parku na pikniku, ale heta čaroŭnaja historyja. Žančyna lacić uvierch, jak anioł. Mužčyna staić na ziamli, trymaje jaje za ruku: uśmichajecca.
Heta karcina niby pieradaje niešta ź inšaha śvietu. Jana nahadaje tabie, jak heta — być dziciem. Jak prosta być ščaślivym.
Toje pačućcio, kali Tomas N'Kona [varatar zbornaj Kamieruna na ČS u 1990-m — NN] vybivaje miač.
Kali babula kliča ciabie z kuchni.
Kali ty siadziš u ciemry pierad televizaram i molišsia.
Z uzrostam my zabyvajemsia pra hety pačućci.
Treba viarnucca ŭ muziej na nastupny dzień. Nieabchodna.
Žančyna na kasie pahladzić na ciabie z uśmieškaj. Jana spytaje: «Chiba vy nie byli ŭ nas učora?».
Nie važna. Idzi ŭnutr. Mastactva =- lepšaje lačeńnie dla ciabie. Kali ty adkryješ svoj rozum, unutrany ciažar źniknie. Palacić, jak taja žančyna na karcinie Šahała».
